Ұстанымның дәлеліндей Ақтау қаласындағы Назарбаев зияткерлік мектебінің 10 оқушысы Лионда өткен Біріккен Ұлттар Ұйымының моделі халықаралық конференциясына қатысып қайтты. «Су: өзгерістерге құлшыныс» тақырыбында өткен жиынға Израиль, Ұлыбритания, Қазақстан мен Франциядан 350 жоғары сынып оқушылары және 50 студент қатысты.
Сегізінші рет өткен шараны Лиондағы халықаралық мектеп пен Сколе халықаралық университеті студенттері ұйымдастырған. Көшбасшылардың басын қосқан жиынға Нұркамал Алихан, Құралай Санат, Айдана Бакитова, Кәмшат Ақмұратова, Мирланбек Шаншаров, Ақбота Алпамысова, Дана Есбергенова, Ақжібек Сағындыққызы, Хисами Томирис есімді оқушылар қатысып, су тақырыбындағы өзекті мәселелерді шешуге арналған қарарларды қабылдады.
«БҰҰ 2015 жылы 17 тұрақты даму мақсатын айқындады. ILYMUN конференциясы осы жолы 6-шы (су және санитария) және 14-ші (су өмірі) мақсаттарына тоқталды. Қазіргі таңда су мәселесі дүние жүзін алаңдатып отыр. Жер бетіндегі демографияның өсуі және жаһандық жылыну және су көздерінің құрғап қалуы бұл тақырыптың өзектілігін арттырып отыр. Соның нәтижесінде жаңа типтегі халықаралық қақтығыстар туындауда. Конференция барысында делегаттар өз елінің қызығушылықтарын ескере отырып, мәселенің шешімін табуы тиіс» делінген конференцияның ресми мәлімдемесінде.
Ал ақтаулық оқушылар аталған жиынға тұңғыш рет қатысты.
– Конференция барысында біз ғаламдық проблемаларды шешуге арналған қарарларды қабылдадық. Бұл тұлғалық дамуға үлкен септігін тигізеді деп ойлаймыз. Себебі мен табиғат-анаға деген жауапкершілікті сезініп, командада жұмыс жасау қабілетімді арттырдым. Екіншіден, тұңғыш рет мультикультурализм түсінігімен бетпе-бет келдім. Жиында ағылшын тілінде сөйлегенімізбен, грек, француз, ирланд тілдерін де естіп отырдым, – дейді тұщы су ресурстарын қолдану және сақтау туралы баяндама оқыған Томирис Хисами.
БҰҰ Моделі конференциясы биыл наурыз айында Ақтау қаласындағы Назарбаев зияткерлік мектебінде ұйымдастырылмақ.
Маңғыстау облысы
