Еліміздің әйелдер және грек-рим күресі шеберлері осы жарыста қандай құрамда өнер көрсететіні жайында біз бұған дейін хабарлағанбыз. Көп кешікпей еркін күрестен Қазақстан ұлттық құрама командасының бас бапкері Әсет Серікбаев өз таңдауын жасады.
Үнді елінде күш сынасатындар қатарында былтыр Нұр-Сұлтандағы әлем чемпионатында жеңіс тұғырына көтерілген үш балуанымыздың екеуі бар. Олар – Нұрислам Санаев (57 кило) пен Дәулет Ниязбеков (65 кило). Тек 70 кило салмақта күміс медальді мойнына ілген Нұрқожа Қайпановты осы жарыста Мейіржан Әшіров алмастырған екен.
Сонымен қатар, Нью-Делиде Нұрболат Абдуалиев (61 кило), Данияр Қайсанов (74 кило), Ғалымжан Өсербаев (79 кило), Азамат Дәулетбеков (86 кило), Илизхан Чилаев (92 кило), Әлiшер Ерғали (97 кило) және Юсуп Батырмурзаев (125 кило) сынды сайыпқырандар белдеседі.
