Тараптар ДДҰ аясында денсаулық сақтау саласы бойынша Тұрақты даму мақсаттарына жетудің, соның ішінде, ана мен бала өлімін қысқарту, түрлі қатерлі аурулармен күрестің өзекті мәселелерін талқылады.
Мәжіліс Төрағасының пікірінше, халық денсаулығын қорғау әлем елдеріне ортақ мәселе. Осы жолда Қазақстан 30 жылға жуық ДДҰ-мен етене ынтымақтастық орнатып келеді. Әсіресе, алғашқы медициналық-санитарлық көмек бағытында сындарлы қатынас орнаған. Н.Нығматулин 2014 жылы Алматыда ДДҰ-ның географиялық жағынан шалғайдағы медициналық-санитарлық көмек жөніндегі кеңсесі ашылғанын алға тарта келіп, 1978 жылы аталған көмек бойынша Алматы Декларациясы Қазақстанда қабылданғанын еске салды. Осының барлығы біздің еліміздің алғашқы медициналық-санитарлық көмекті дамыту саласындағы тұрақты саясатының көрсеткіші. Қазақстандағы Алматы кеңсесі жұмысының нәтижесінде бүгінде Қазақстанда, жалпы аймақ көлемінде үздік технологиялар енгізіліп, денсаулық сақтау қызметкерлерінің кәсібилігін арттыру қолға алынуда.
Мәжіліс Төрағасы қазіргі уақытта Мәжілісі қарауында бүкіл қоғам болып талқылап жатқан жаңа Денсаулық кодексі бойынша белсенді жұмыс атқарылып жатқанын айта келіп, бүгінгі нақты жағдайлар мен тұрақты өзгерістер кезеңінде тұрғындардың денсаулығын күшейту үшін жаңа мүмкіндіктерге жол ашуымыз керек. Денсаулық мәселесіне қатысты барлық мәселелер әрқашанда Мәжіліс жұмысының басым бағыттарының бірі, – деді.
Өз кезегінде Ханс Клюге денсаулық саласын ілгерілетуде Қазақстанның әлеуеті мен басымдықтары зор екенін атап өтті. Мейманның айтуынша, Қазақстан алғашқы медициналық-санитарлық көмек дүниеге келген жер деуге болады. Х.Клюге мырза, біздің еліміздің әлеуметтік-экономикалық табыстарына тәнті екенін жеткізіп, алдағы уақытта қол қойылған арнайы келісім бойынша денсаулық саласына заманға сай жаңалықтар енгізу, соның ішінде цифрландыру бағытында бірлесе, белсенді жұмыс атқаратынын атап өтті.
Н.Нығматулин ДДҰ өкілінің мол тәжірибесі тек Еуропа аймағында ғана емес, жалпы әлем елдерін ортақ мақсат жолында біріктіруге ықпал ететініне сенім білдірді, деп хабарлады Парламент Мәжілісінің баспасөз қызметі.
