Белгіленген тәртіпке бағынбай жолға шыққан аса ауыр жүк көліктерінің иелеріне енді қомақты айыппұл салынатын болады. Облыс әкімінің бірінші орынбасары Қосман Айтмұхаметовтің төрағалығымен өткен аппарат мәжілісінде тиісті органдарға жолдағы ауыр жүк көліктерінің қозғалысын қатаң бақылауға алу жүктелді. Жол құрылысы-жөндеу жұмыстарының ауқымы бойынша Түркістан облысы республикада көш бастап тұр. Өткен жылы 1 738 шақырым жол мен көше құрылыс-жөндеу жұмыстарымен қамтылып, оның 1 270,4 шақырымы пайдалануға берілген. Биыл 869,8 шақырым жолда құрылыс-жөндеу жұмыстары жүргізілмек. Өңірдегі автомобиль жолдары мен елді мекен көшелерінің жалпы ұзындығы – 20 928,9 шақырым. Жергілікті маңызы бар автомобиль жолдарының жақсы және қанағаттанарлық жағдайдағы үлесі өткен жылы 74,1 пайызға жеткен. Аталған көрсеткішті биыл 80%-ға жеткізу көзделуде.
