Жалпы, 2019 жылы экономиканың барлық салалары бойынша экономикалық өсудің қарқыны сақталды. Облыс бюджеті жыл басында 239,2 млрд теңге болып бекітіліп, жыл соңында 304,6 млрд теңгеге дейін ұлғайды. Бюджет қаражатының 60% әлеуметтік міндеттерді шешуге жұмсалды. Жалпы жан басына шаққандағы әлеуметтік шығыстар бойынша өңір облыстар арасында көш бастап тұр.
Негізгі капиталға инвестициялар 17,4%, құрылыс жұмыстарының көлемі 54,3% , тұрғын үйді пайдалануға беру 8,8% өсті. Сондай-ақ ауыл шаруашылығының жалпы өнімінің көлемі 4,3%, өңдеу өнеркәсібінің көлемі 1,3%, бөлшек тауар айналымының көлемі 1,5% ұлғайды. Жыл ішінде өңірде 17291 жұмыс орны құрылды, оның 12678 тұрақты. Өткен жылдың қорытындысымен Қызылорда экономикалық дамудың 7 көрсеткіші бойынша 8 үздік облыстың қатарына кірді. Индустриялық-инновациялық даму бағытында да нәтиже жаман емес. 2018 жылдың желтоқсанында қолданысқа берілген тампонажды цемент зауыты қазір өнімнің алты түрін шығарды. Цемент көрші өңірлерге – Түркістан, Ақтөбе, Алматы, Жамбыл облыстарына және Шымкент қаласына сатылады. Сонымен қатар 40 мың тонна Өзбекстанға экспортқа жіберілді, – деді облыс әкімі.
Халықты тұрақты жұмыспен қамтамасыз ету, жұмыссыздық деңгейін төмендету мақсатында 2018-2020 жылдар аралығы өңірде жаппай кәсіпкерлікті дамыту жылы болып жарияланған. Жүйелі шаралар нәтижесінде жұмыс істеп тұрған кәсіпкерлік субъектілерінің саны соңғы жылы 9,3% өсіп, 46297 бірлікті құрады. Кәсіпкерлік субъектілерінен түскен салық түсімдерінің көлемі 11 % өсті. 2019 жылдың басынан бастап екінші деңгейлі банктер шағын және орта бизнес субъектілеріне жалпы сомасы 21,9 млрд теңге болатын кредиттер берді, оның ішінде мемлекеттік бағдарламалар шеңберінде жалпы сомасы 5,6 млрд теңгеге 166 жоба қаржыландырылды.
Өңір басшысы облыстың әлеуметтік-экономикалық дамуының 2019-2022 жылдарға арналған кешенді жоспары аясындағы жұмыстарды да айтып өтті. Қазақстан Республикасы Үкіметінің қаулысымен бекітілген жоспар шеңберінде 2020 жылы Шу-Сарысу шөгінді бассейнінде мұнай-газ перспективалы құрылымдарын анықтау мақсатында жер қойнауын зерттеу жұмыстары басталады. Экономиканың түрлі салаларына жоғары технологияларды жедел енгізу үшін цифрландыру бойынша 2018 жылдан бастап 47 жоба іске асырылды, қазіргі уақытта 11 жоба бойынша жұмыстар жүргізілуде. Қызылорда облысы бірінші болып «Бірыңғай кезекшілік диспетчер қызметі» жобасын іске қосты. Енді барлық жедел қызметтер (101, 102, 103, 112) бірыңғай «112» нөмірімен жұмыс істейтін болады.
Облыс әкімінің есеп беру баяндамасынан кейін тұрғындар сауал қойды. Олардың арасында мүгедектерге арналған Инватакси қызметін ұлғайту, кейбір елдімекендерге ауызсу жеткізу, жол мен көпір салу секілді мәселелер айтылды. Аудандардан түскен ұсыныс-тілектер CALL-орталық арқылы қойылды. Облыс басшысы барлық сауалдарға жауап беріп, осы бағытта атқарылатын шаралар жайлы айтып өтті.
