Боран қаупі болуы себепті алыс жолға шығудан бас тарту туралы ескертулер мен ұсынымдар SMS-хабарламалар мен әлеуметтік желілер арқылы жаппай жіберіліп жатыр. Бірақ облыс тұрғындарының кейбірі бұған қарамай жолға шығып, қар құрсауында қалып қоюда. Соның бірі – Ғабит Мүсірепов ауданының 55 жастағы тұрғыны Сергей Тарасов. Ол кешкісін Тахтаброд ауылынан Новоишим ауылына бара жатқан. «Екатеринбург-Алматы» тас жолындағы Рузаевка ауылының маңында боранның құрсауына түсіп, алға жүруге мүмкіндігі болмай тұрып қалады. Осы жерде Сергей Тарасов басқа азаматтардың қауіпсіздігін ойлап, смартфонына бейнеүндеу жазып алып, өз тарапынан жерлестеріне өзіне төнген қауіпті көрсете отырып, жолға шығудың қауіпті екенін ескерткен.
Осы ауданның полиция бөлімінің бастығы, полиция подполковнигі Айдос Ідірісовтің айтуына қарағанда, 18 ақпан күні қар құрсауынан 6 фур, 6 «КамАЗ», 10 жеңіл көлік пен 2 «Газель» автокөлігі шығарылған. Жүргізушілер мен жолаушылардың біршамасы Рузаевка ауылындағы қонақүйге, қалғандары лицей жатақханасына орналастырылды. Барлығы ыстық тамақпен қамтамасыз етілді.
Ал Жамбыл ауданында патрульдік полицейлер мен төтенше жағдай қызметкерлері ҚХР азаматына да көмек көрсеткен. Боранның болатынын айтқан ескертулерге қарамай Нұр-Сұлтан қаласынан автокөлігімен Қайранкөл ауылына шығып кеткен 32 жастағы Джан Сяобо жолдағы «Украинское» ауылына 5 шақырым қалғанда қалың қарға кептеліп қалған. Сақшылар мен құтқарушылардың, жергілікті атқарушы органдардың күшімен арнайы техника жұмылдырылып, қытайлықтың көлігі қардан шығарылды. Джан Сяобо да бейнежазба түсіріп, өзіне көмек көрсеткендерге шын жүректен алғысын айтты.
Өңірде боран әлі де тыншымай тұр. Облыстық ПД бастығы, полиция полковнигі Марат Төлебаев ауа райының қолайсыздығына байланысты жеке құрамға қала сыртындағы жолдарды тәулік бойы бақылауды және көмекке мұқтаж азаматтарға жедел түрде қол ұшын беруді тапсырды. Басты мақсат – боран салдарынан ешкімнің зардап шекпеуін қамтамасыз ету.
Солтүстік Қазақстан облысы
