Мұнайлы өлкедегі Қызылсай мемлекеттік өңірлік табиғи паркі Маңғыстау облысының табиғи ресурстар және табиғат пайдалануды реттеу басқармасына қарайды. «Қызылсай» мекемесінің қызметі – тиісті ерекше қорғалатын табиғи аумақтардағы жануарлар дүниесі мен өсімдік түрлерін қорғап, қоршаған ортаның бүлінбеуі мен браконьерлерге қарсы жұмыстар жүргізу. Мекеменің құрамында бір өңірлік парк және жергілікті маңыздағы алты қаумал бар. Солардың бірі – Каспий теңізімен шектесетін «Адамтас» қаумалы. Шектеу аумағы – 38 шақырым. Теңізге енген арал 0.4 аумағы бойында орналасқан. Аумаққа Кендірлі мүйісінің солтүстігіндегі ұсақ аралдар кіреді. Аталған аралда және теңіз аумағында республикалық дәрежедегі Кендірлі демалыс орны орналасқан. Бұл аумақтар Қызыл кітапқа енген итбалықтың шоғырланған аумағы және балықтар мен ерекше кездесетін суасты өсімдіктері бар. Құстар үшін көктемгі және күзгі мезгілдерде ұшып келу және ұшып кету мекені. Алайда, қазіргі таңда қаскөйлердің теңіз арқылы арнайы қайықтармен келіп, балықтарды заңсыз аулау фактілері көрініс тауып отыр. Өкініштісі, бұл тек бүгіннің емес, бертінге дейін жалғасын тауып келе жатқан қылмыс. Инспекторлардың қарсы тұруына арнайы техникалардың болмауы қолбайлау болып келді. Яғни, аталған аралда табиғат байлықтарын қорғау су көліктерін көптен бері қажет етіп келген болатын. Жаңалыққа «Теңізшевройл» ЖШС-мен келіссөздер жүргізудің нәтижесінде қол жетті. Аталған компания «Қызылсай» мемлекеттік өңірлік табиғи паркі» коммуналдық мемлекеттік мекемесіне теңізде тез жүргіш екі катерді сыйға тартты. Басқару тақтасы алюминийден жасалған Kazboat маркалы кемелердің әрқайсысының сыйымдылығы 500 килоға дейін жүк көтере алады. Енді табиғат қорғаушыларға күннің ыстығы мен суығына қарамай өз қызметтерін алаңсыз атқаруға жағдай жасалды. Компанияның бұл табиғат қорғаушыларға алғашқы көмегі емес екен. Маңғыстау облысының табиғи ресурстар және табиғат пайдалануды реттеу басқармасы мен «Теңізшевройл» ЖШС арасындағы жемісін берген келіссөздер алғаш рет 2019 жылдың 22 тамызында бастау алған. Ол кезде «Теңізшевройл» ЖШС «Қызылсай» мекемесіне 7 вагон-үй, 22 фототұзақ пен 2 дрон сыйға тартыпты.
Бұл жолы катерлерді табыстаған шара Ақтау қаласы «Бриз» яхта клубының аумағында өтті. Облыс әкімдігінің, аумақтық орман шаруашылығы және жануарлар дүниесін қорғау инспекциясы, экология департаменті, «Қызылсай» мекемесі, Батыс аймағы Каспий теңізіндегі мемлекеттік шекара қызметі 22/01 А әскери бөлімі, табиғат пайдаланушылар, балық шаруашылығы қауымдастығының өкілдері қатысқан шарада Маңғыстау облысының табиғи ресурстар және табиғат пайдалануды реттеу басқармасының басшысы Дүйсен Құсбеков қорықшыларға қол ұшын берген және әлеуметтік тұрғыда өңірдің тұрмыс жағдайы мен табыс көзіне аса мән беріп, біршама қызмет атқарып жүрген «Теңізшевройл» компаниясына алғысын білдірсе, «Теңізшевройл» ЖШС Үкімет және жұртшылықпен байланыс бөлімінің бас менеджері Ризабек Артығалиев екіжақты келісім мен табиғатты қорғаудың маңызын сөз етті.
– Былтыр құны 45 млн теңгені құрайтын құрал-жабдықтарды сыйға тарттық. Біз өзіміз сыйлаған жабдықтардың пайдасы туралы естіп, қуанып қаламыз. Өңірдегі экожүйені сақтауға атсалысу біз үшін де маңызды, – деді Р.Артығалиев.
Заңды белінен басып, табиғатқа арам қолын араластыратын қаскөйлерге қорықшылар енді қос катермен қарсы шықпақ. Бұл – өңірде экожүйені сақтаудың сапасын арттыра түсетін болады.
Маңғыстау облысы
