Ұжымның негізгі бағыты – неоклассика мен заманауи хореографияны бір актілі балетке тоғыстырған «Astana Ballet presents» бағдарламасы алғашқы күні-ақ алматылықтардың таңдайын қақтырды. Бір бағдарламаға біріктірілген үш балеттің екеуін Германия мен Американың хореографтары «Астана балет» үшін арнайы қойған. Раймонд Ребектің «Өткенге саяхат» және Николе Фонтенің «Махаббаттың ғайып болған дарабоздары», сондай-ақ Джордж Баланчиннің И.Бахтың музыкасына қойған «Кончерто Барокко» қойылымы заманауи балеттің барлық мүмкіндігін жан-жақты ашып көрсеткен жаңашылдығымен көрерменді бірден баурады. Шығармашылығында «музыканы көріп, биді есту» тұжырымын ұстанған Баланчиннің туындысы музыка мен бидің ғажайып үйлесімін көрсетті. «Кончерто Барокко» қойылымында Баланчин балериналарды алғаш рет сахнаға жеңіл, ықшам көйлекпен шығарды. Балериналардың көзге үйреншікті костюмінің бірінші рет ер адамның жейдесімен алмастырылуының өзі би өнерінде қалыптасқан стандартты батылдықпен бұзып-жара алатынының белгісі еді. Сахнада ғажайып геометриялық өрнектер сызған бишілердің өнерін санада қорытып үлгерудің өзі оңайға соққан жоқ. Бірақ «тіл атаулының ішіндегі ең түсініктісі – өнер тілі», күрделі техникаға құрылғанына қарамастан, қауырсындай жеңіл би қимылдары жүрек пен жүйкенің ең керекті талшығын тауып алып, бойдағы сезімнің бәрін жанап өтіп жатыр. Бірде төбең көкке жеткендей, бірде құздан құлағандай, оттан алып суға, судан алып мұзға салғандай, толқу, тебірену, тітіркену сияқты алай-дүлей алмағайып сезімдер адамды бір сәт құрсауынан босатпайды. Сол себепті болса керек, әдепкі дәстүрлі бағыттың барлық өлшемін бырт-бырт үзген неоклассикалық бұл бағдарламаны балет сыншылары, хореографтар, бастысы, қарапайып көрермен ыстық ықыласпен қабылдады. «Бұл ғажап өнер жарнамаға зәру емес, өйткені бұл – Баланчин. Осы жылдар аралығында труппаның қалай өзгергенін әртістердің, театрдың көркемдік жетекшілігі мен педагогтардың жанкешті еңбегінен-ақ байқауға болады. «Гамбург есебінің» ең биік көрінісі осындай-ақ болар! Басқаша атау мүмкін емес, Баланчинше билеп, көрерменнің көңілінен шығу оңай емес. Бұл ұжымның қолынан келді», дейді Қазақстанның еңбек сіңірген әртісі Эдуард Мальбеков.
«Сөз жоқ, бұл Қазақстанның мәдени өміріндегі маңызы зор оқиға. «Астана Балет» кәсіби деңгейдің биік үлгісін көрсетті. Бұл шағын қойылымдарда көрерменге әсер етудің титтей де жасанды тәсілі қолданылған жоқ, бірақ аса бай хореография мен батылдықты көрмеу, сезінбеу мүмкін емес» деп толықтырды әріптесінің ойын Қазақстанның халық әртісі Гауһар Мырзабекова.
Ал ертеңінде «Астана Балеттің» жетекші солистері Татьяна Тен, Қазбек Ахмедьяров, Айжан Мұқатова, Назерке Аймұхаметова, Сүндет Сұлтанов және Аңсаған Көбентай әлемдегі ең танымал ертегілердің бірі «Күлше қыз» туралы хикаяны баяндап берді. Екі бөлімді балетті қойған хореограф Надежда Калинина, Сергей Прокофьевтің тамылжыған музыкасын орындаған симфониялық оркестрге дирижерлік жасаған Арман Оразғалиев көрерменге аса ауқымды қойылым ұсынды. Қазақстан балет өнерінде мұндай үлкен премьера бұрын-соңды болмаған, оркестр үшін де күрделі партитуралардың бірінен саналады. Сценографиялық өнер саласының ең соңғы жетістігімен безендірілген сахна, сиқырлы хореография, би өнеріндегі биік шеберлік бұл ертегі-балетке өміршең тағдыр белгілеп, көрерменнің есінде ұзақ сақталатынын бір кеште дәлелдегендей. Театрдың ең беделді бишісінен бастап Қазақ ұлттық хореография академиясының жасөспірім оқушысына дейін жұмылдырылған қойылым – ұлттық балет өнерінің бағындырған биік бір белесі. «Алматыда өнер көрсету бізге зор жауапкершілік жүктейді, бір жағы, бұл талғампаз көрерменнің алдындағы есеп беруіміз іспетті. Себебі болашақ кәсіби мамандар Алматыдағы балет мектебінен түлеп ұшады. Мұнда біздің ұстаздарымыз қызмет етеді. Бұл қаланың көрермені де ерекше – зерделі, талғамы биік әрі зиялы», дейді театрдың бас балетмейстері Мукарам Авахри.
АЛМАТЫ
