1 қаңтардан бастап елімізде міндетті әлеуметтік медициналық сақтандыру жүйесі іске қосылды. Бүгінде Қазақстан халқының 90%-дан астамы, яғни 17 млн адам сақтандырылған. Оның 11 млн-ға жуығы жеңілдігі бар 15 санатқа жатады. Олардың жарнасын мемлекет өзі төлейді.
Қаңтар айында МӘМС үшін аударылған жарнаның көлемі 34,2 млрд теңгені құраған. Оның 24 млрд теңгесі – мемлекет есебінен жеңілдігі бар санаттар үшін төлеген жарна. Осыны айтқан Айбатыр Жұмағұлов қаңтар айының қорытындысы бойынша көрсетілген консультациялық-диагностикалық қызметтер 2019 жылдың қаңтарымен салыстырғанда 27%-ға артқанын жеткізді. «Оның ішінде КТ және МРТ қызметтерін тұтыну 54%-ға, УДЗ 21%-ға артты. Қалпына келтіру емі және медициналық оңалту қызметтерінің барлық түрлері 48%-ға өсті, оның ішінде неврология (инсульт) бейіндері бойынша көрсетілген қызметтер көлемі 3,2 есеге көбейді», деді ол.
Қор басшысының айтуынша, Әлеуметтік медициналық сақтандыру қоры 2020 жылға 1 258 медициналық ұйыммен келісімшарт жасасқан. Оның 657-сі мемлекеттік болса, 601-і – жекеменшік. «Бірақ көлем жағынан есептейтін болсақ, 20%-ға жуық медициналық мекемелерге келісімшарт бойынша ақша таратылды, келісім жасастық. Әрине біз МӘМС аясында жеке кәсіпорындарды ынталандыруға мүдделіміз. Біз келісімшарт жасасқан кезде мемлекеттік немесе жеке кәсіпорын деп бөлмейміз. Бәріне қойылатын талап бір. Медициналық қызметтерді сатып алуда электронды жүйеге көштік. Сол себепті олардың қатысу мүмкіндігі де артты. Біз осы айдан бастап медициналық ұйымдарға стикерлер іліп жатырмыз. Ондағы мақсатымыз – бірінші ретте тұрғындарға осы медициналық ұйымда тегін медициналық көмек алуға мүмкіндік бар екенін көрсету. Яғни МӘМС-ке қатысы бар екенін түсіндіру. Сондықтан да азаматтардың өзінің құқықтарын сол жерде талап етуге мүмкіндігі бар. Азаматтардың клиниканы таңдауына болады. Бейінді мамандарға көңілі толмай, басқа клиникаға барғысы келсе оған да мүмкіндік қарастырылған. Тек учаскелік дәрігерден жолдама алуы шарт», деді басқарма төрағасы.
1 сәуірге дейін елдің барлық тұрғындары шартты түрде сақтандырылған болып саналады және олар тегін медициналық көмектің кепілдендірілген көлемі (ТМККК) және МӘМС пакеттері аясында медициналық қызметтерді тегін ала алады. Осы кезеңде азаматтар өздерінің сақтандыру мәртебесін анықтап, міндетті медициналық сақтандыру жүйесіне тіркелуі керек. Жеңілдік кезеңі аяқталғаннан кейін, сақтандырылмаған пациенттер медициналық көмек алуды жалғастыра береді, ол тек ТМККК аясында ғана, ал қалған қызметтер ақылы болады. Сондықтан 31 наурызға дейін МӘМС жүйесінде сақтанушының мәртебесін алу маңызды.
Өткен жылдың қыркүйегінен бастап МӘМС бойынша 1406 бірыңғай байланыс орталығы жұмыс істей бастады. Қазірге дейін call center-ге халықтан 37 мыңнан астам өтініш келіп түскен. «Оның 97%-ы кеңес алу болса, 3%-ы – шағымдар мен арыздар. Call center 1 қаңтардан бастап 24/7/365 тәртібі бойынша жұмыс істейді», деді Айбатыр Жұмағұлов.