Осы орайда Жамбыл облыстық тілдерді дамыту басқармасының ұйымдастыруымен Қазақстан Республикасы Президентінің латыннегізді қазақ тілі әліпбиін жетілдіруге қатысты тапсырмасына және Қазақстан Республикасы Премьер-Министрінің орынбасары бекіткен «Қазақ тілінің латын графикасы негізіндегі әліпбиін жетілдіру бойынша 2020-2025 жылдарға арналған іс-шаралар жоспарына» сәйкес, өңірдің жоғары, техникалық және кәсіптік білім беру мекемелерінің филолог ғалымдары мен оқытушылары арасында ашық талқылау өтті. Аталған жиынды облыстық тілдерді дамыту басқармасына қарасты «Тілдерді оқыту орталығы» мекемесінің директоры Гүлхан Әлімбекова ашып, жүргізіп отырды. Филологтардың назарына орфографиялық, әдістемелік, терминологиялық және ІТ-сүйемелдеу жұмыс тобының бірлескен отырысында мақұлданған жетілдірілген әліпби нұсқасы ұсынылды.
Бұл ретте жиынға келген тіл мамандары латын әліпбиіне қатысты өздерінің ой-пікірлерін айтты. М.Х.Дулати атындағы Тараз мемлекеттік университеті әлеуметтік ғылымдар факультеті «Филология және журналистика» кафедрасының меңгерушісі, филология ғылымдарының кандидаты, доцент Күлзинат Қарымбаева, М.Х.Дулати атындағы Тараз мемлекеттік университетінің аға оқытушысы Балмира Мырзабаева өз ойларын ортаға салды. Ғалымдар жетілдірілген әліпби құрамында 31 әріп бар екенін, оның төртеуі умлаут, бревис, макрон, седиль диакритикалық таңбасы арқылы берілгенін, әрбір диакритикалық белгі тіліміздің дыбыстық ерекшелігіне қарай дауысты және дауыссыз дыбыс таңбасының бөлек екенін, әліпбидегі әр диакритиканың өз қызметі бар екенін атап өтті. Сондай-ақ, жиында өзге де тіл мамандары латын әліпбиіне қатысты өздерінің пікірлерін айтып, бұл оқылым үдерісін жеңілдететінін, тіліміздің дыбыстық қорының әліпбиде айқын көрінуін қамтамасыз ететінін, сондықтан да ғалымдардың шартты түрде бұл нұсқаны тіліміздің дыбыстық жүйесін айқын көрсететін нұсқа деп атап отырғанын жеткізді. Талқылау барысында ұсынылған қорытындылар мен пікірлер еліміздің Мәдениет және спорт министрлігі Тіл саясаты комитетіне жолданатын болады.
Жамбыл облысы
