Бүгінге дейін 4650 адамға мониторинг жүргізілді, оның ішінде 1 «а» санаты бойынша – 1217, 1 «б» санаты бойынша – 189, 2 санат бойынша 3244 адам медициналық бақылауда болды. 11 наурыздағы жағдай бойынша барлығы 3974 адам бақылауда тұр. Коронавирус бойынша Қазақстандағы соңғы эпидемиологиялық жағдайды баяндаған Денсаулық сақтау министрлігі 11 наурыздағы жағдай бойынша барлығы 90 адам дене қызуымен және ЖРВИ-мен, оның ішінде 1 «б» санаты бойынша – 20 адам, 2 санат бойынша – 36 адам, 3 санат бойынша 34 адам емдеуге жатқызылғанын мәлімдеді. Емдеуге жатқызылған 90 адамның ішінен 52 адам шығарылды. 38 адам стационарда жатыр.
Ал дүние жүзі бойынша 117 мемлекетте 38140 адам коронавирус инфекциясын жұқтырған. 1135 науқас көз жұмды. Министрлік берген мәліметтерге қарағанда әлемде инфекция жұқтырғандар саны күн сайын 13,7 пайызға, өлім-жітім 2,9 пайызға артып отыр.
Осы аптада Түркияда да коронавирустың жаңа түрін жұқтыру оқиғасы алғаш рет тіркелді. Бұл туралы Түркияның денсаулық сақтау министрі Фахреттин Қожа мәлімдеді. Оның айтуына қарағанда вирус жұқтырған адам Түркияның азаматы, жақында ғана Еуропадан келген екен. Қазіргі уақытта карантинге жабылған науқастың жағдайы тұрақты.
Коронавирустың өршіп бара жатқанына алаңдаған 3,5 мыңға жуық турист Нью-Йорктегі БҰҰ штаб-пәтеріне турдан бас тартты. Экскурсиялық бюро басшысы Винченцо Пулиезе турлар 31 наурызға дейін болмайтынын айтады. Сондай-ақ енді тек БҰҰ территориясына рұқсат қағазы барлар ғана штаб-пәтерге кіре алады.
Ал биылғы 24 шілде мен 9 тамыз арасында өтеді деп жоспарланған Токио Олимпиадасы коронавирусқа байланысты бір немесе екі жыл кейінге қалдырылуы мүмкін. Жапониядағы ұйымдастыру комитетінің мүшесі Харуюки Такахаши бұл жөнінде «Олимпиаданы келесі жылы өткізу қиын болады, себебі ол кезге маңызды спорт сайыстары жоспарланып қойған. Сондықтан Жазғы ойындарды екі жылдан кейін өткізген дұрыс» дейді.
Киев мэрі Виталий Кличко коронавирус тарауының алдын алу үшін 12 наурыздан бастап Украина астанасында карантин жарияланатынын мәлімдеді. Қала басшысы орта және жоғары білім мекемелерінде, балабақшаларда, шығармашылық және спорт мектептерінде оқу процесіне шектеу қойылатынын айтты. Сондай-ақ қалада көп адам қатысатын іс-шаралар шектеледі. Бұл концерттер, конференциялар, киносеанстар және басқа да іс-шараларға қатысты. Ойын-сауық орталықтары да жабылады.
Қазақстанда да WhatsApp мессенджері арқылы 11-22 наурыз аралығында карантин жарияланғаны туралы ақпарат тараған болатын. Алайда Денсаулық сақтау министрлігінің ресми өкілі Диас Ахметшәріп бұл ақпарат шындыққа жанаспайтынын мәлімдеді. «Бұл – жалған. Елдегі жұмыс күндерін қамтуды Үкімет шешеді» деді, ресми өкіл.
