Нұр-Сұлтан қаласы әкімінің орынбасары Бақтияр Макеннің төрағалық етуімен штаб құрылды. Қолға алынған алдын алу шаралары туралы қалалық әкімдіктің баспасөз орталығында қалалық Қоғамдық денсаулық сақтау басқармасының басшысы Сәуле Қисықова, Тауарлардың сапасы мен қауіпсіздігін бақылау департаментінің басшысы Зекен Исақов және Инвестициялар және кәсіпкерлікті дамыту басқармасының басшысы Ерлан Бекмұрзаевтың қатысуымен өткен брифингте айтылды.
С.Қисықова қаланың барлық медициналық ұйымдары сақадай сай екенін, яғни дәрі-дәрмек, медициналық бұйымдармен және жеке қорғаныс құралдарымен толық қамтамасыз етілгенін, сондай-ақ медицина қызметкерлері арнайы семинарлар мен жаттығулардан өткенін атап өтті. «Медициналық персонал эпидемияға қарсы режім мен санитарлық-эпидемиологиялық талаптарға сәйкес оқытылды. Қауіпті елдерден келген азаматтар 14 күнге карантинге алынып, карантиннен кейін үйде 10 күн бақылауда болады. Эпидемиологиялық қаупі бар елдерден келген адамдардың санатына байланысты жұқпалы, уақытша және карантиндік ауруханалар дайындалғанын атап өткен жөн. Бұл уақытша аурухана барлық қажетті санитарлық-эпидемиологиялық талаптарға сай, яғни әр бөлмесінде теріс қысыммен жабдықтау және желдету жүйесі бар, бұл жүйелер ауруханадағылардың арасында инфекцияның таралуын болдырмайды. Сондай-ақ олар қауіпті елдерден келген адамдарды үйде тексеруден өткізеді. Бұған қоса қауіпті елдерден келгендерді оқшаулауға арналған қосымша төсектер орналастырылды. Қазіргі уақытта бұл уақытша ауруханада Қазақстан азаматтарымен қоса елімізге келген басқа елдің азаматтары да бар», деді ол.
Басқарма басшысы егер адамда температураның жоғарылауы, жөтел сияқты белгілер болған жағдайда медициналық мекемелерге бармай үйде болу керектігін және Call-орталыққа (1406 нөміріне) қоңырау шалып кеңес алып немесе жедел жәрдем шақыруы қажет екенін айтты.
Елордадағы балабақшалар жұмысын жалғастыра беретінін айтқан Сәуле Қисықова: «Дүйсенбіден бастап мектеп оқушыларының сабағы тоқтайды. Ал балабақшалар жұмыс істей береді. Бірақ біз ата-аналарға кеңес ретінде қалдыра алатын жер болса балабақшаға апармағаны абзал екенін айтудамыз. Бірақ бұл шектеу емес, тек кеңес. Мектепке дейінгі мекемелер мен балабақшалар да дезинфекциялау жұмысы, сол сияқты медициналық бақылау күшейтілген режімде жүргізіліп жатыр», деді.
Ал Ерлан Бекмұрзаев азық-түлік қауіпсіздігі жөніндегі іс-шаралар жоспарына сәйкес, оларды тікелей жеткізу мәселесі өңірлермен пысықталғанын атап өтті. Оның айтуынша, бүгінгі таңда әлеуметтік маңызы бар азық-түлік өнімдерін жеткізуде үзілістер жоқ. Қаланың сауда желілері мен қоймаларындағы қорлар жеткілікті мөлшерде сақталған. «Аптаның басында әкімдікте оперативті түрде жиын өткіздік. Онда әлеуметтік маңызы бар тауарлармен толық қамтамасыз ету мәселесін қарастырдық. Қазір қалада азық-түліктің азайып қалуы туралы проблема жоқ. Бүкіл сауда желілері мен қоймалар азық-түлікке толы. Magnum, «Астықжан», КеңMart, Small және де қала базарларының бәрінде азық-түлік қоры жеткілікті. Қосымша тағы әкімдіктен 1 млрд теңге қайтарымды ақша айналмалы механизм ретінде берілді. Бұдан бөлек өзге де шаруашылықтармен тікелей келісімшарт бар. Қаламыздағы барлық қоймалар, сауда орындары қажетті азық-түліктермен қамтамасыз етілген. Қажет болса қоймаларды көрсете аламыз. Әдетте жұрт арасында дүрбелең бастапқы үш-төрт күнде ғана болады. Одан кейін бәрі өз қалпына келеді. Ал азық-түлік бағасы мен қоры бізде бақылауда тұр. Бағасы айналмалы механизм арқылы бекітілді. Алайда әлеуметтік маңызды өнімдер бағасының өсуін біз болжай алмаймыз», деді Е.Бекмұрзаев.
Зекен Исақов медициналық маскалардың бағасы туралы түсіндірді. Оның айтуынша, жақында Шымкентте өндірілген 100 мың дана маска жеткізіледі. «Зауытта 49 теңгемен берілетін болады, ал жекелеген сауда үшін біз 56 теңгеден ұсынып отырмыз. Бағаны бақылауға тырысып жатырмыз. Дегенмен, медициналық бетперде аурудан толық қорғай алмайтынын ескерген жөн. Оны тек жөтеліп, түшкіріп жүргендерге ғана тағу керек. Маңыздысы, жұртшылық көп жиналатын тұстардан алшақ болу керек. Сондай-ақ масканы қолданудың да мәдениетін сақтауымыз керек. Адамдар пайдаланылған маскаларды қоқысқа тастап жатқанын көреміз. Сауда орталықтарында да жағдай осындай. Ол ашықтан ашық жатқан күйі ауру таратқыш болуы мүмкін. Біз оны қалай тақтық, солай тиісті жеріне қол тигізбей шешуіміз тиіс. Осы ауруда бар деректерді және қоздырғыштың берілу ерекшеліктерін ескере отырып, жеке гигиенаның қарапайым ережесін сақтау қажет», деді З.Исақов.