Іле-шала түске қарай Денсаулық сақтау министрі Елжан Біртанов Нұр-Сұлтан қаласында бірден індет жұқтырған 14 науқастың тіркелгенін жеткізді. «Бұл науқастар тәртіп бойынша карантинге жатқызылып, олармен байланыста болған барлық азамат анықталуда», деді министр.
Сондай-ақ Е.Біртанов Бас санитарлық дәрігердің жаңа қаулысымен қауіпті мемлекеттердің қатары қайта қаралып, өзгергенін айтты. Атап айтқанда, бүкіл азаматтар карантинге жатқызылуы тиіс 1 «А» санатындағы мемлекеттерге Франция, Иран, Италия, Испания және Германия енгізілді. 1 «Б» санатына Қытай, Корея және бүкіл Шенген аймағындағы мемлекеттер жатқызылды. Бұл елдерден келген азаматтар міндетті түрде үй карантинінде болуы керек. Министр бұл елдерден келетін шетел азаматтарының елімізге кіруіне тыйым салынғанын да атап өтті. Ал 2-санаттағы Филиппин, Қатар, Үндістан, Біріккен Араб Әмірліктері, Ұлыбритания, Әзербайжан, Таиланд және АҚШ-тан келетін азаматтар медициналық мониторингке алынады. Сонымен қатар осы қаулы бойынша еліміздегі бүкіл медициналық ұйымдарға, әлеуметтік медициналық ұйымдарға және интернаттарға карантин енгізіледі. Мұндайда бұл мекемелерге тек өз қызметкерлері ғана кіруге рұқсат. Бұған қоса министр санитарлық дезинфекциялау күшейтілетінін де айтты.
Нұр-Сұлтан қаласы қоғамдық денсаулық сақтау басқармасының басшысы Сәуле Қисықова елордада коронавирус жұқтырған 14 науқаспен байланысқан адамдардың тізімі жасалып жатқанын хабарлады. «ЖРВИ-мен елордада стационарда жатқан әйелдің отбасындағы бір адам Германиядан келген болатын. Байланысқан адамдар ретінде оны бақылауға алдық. 16 наурыз күні әйелдің бойынан клиникалық белгілер байқалғанда, бірден ауруханаға жатқызылып, тексерілді. Бүгін коронавирустық инфекция анықталды», деді ол Орталық коммуникациялар қызметіндегі онлайн брифингте.
С.Қисықованың айтуынша, Оңтүстік Корея мен Италиядан келген 4 қазақстандық та 16 наурызда рейстен түсіріліп, оқшауланған. Енді олармен байланыста болған адамдар анықталуда. 14 адамның 5-еуі қаладағы инфекциялық блоктың стационарында жатқан. Қалған 9 адам да ауруханаға жатқызылды. Бұлардың барлығы Қазақстанның азаматтары. 5 кісі еліміздің өзге өңірлерінің тұрғындары болса, біреуі Нұр-Сұлтанда уақытша тұрып жатқан, ал енді бірі елорда тұрғыны.
Түстен кейін қайтадан шұғыл хабарландыру жасаған Д.Ахметшәріп вирус жұқтырған тағы 5 адамның тіркелгенін жеткізді. Оның 4-еуі Алматыда, 1-еуі елордада анықталған. Кешегі жағдай бойынша Алматыда коронавирус жұқтырғандардың саны 15 адам болса, елордада 18-ге жеткен. Жалпы еліміз бойынша 33 науқас тіркеліп отыр.