Асқақ армандар, биік мұраттарға бой ұрады. Ал төбе-төмпешікке шыққан адам тұмсығының астындағысын ғана аңғарады. Аласа ойлармен, кішкентай мақсаттармен күн кешеді. Себебі ол әуел баста биікке ұмтылмаған. Қой торы күйбеңді, қоңыр тіршілікті місе тұтқан. Шыңға ұмтылғандар, шықпай қоймайды: олар тәуекелшіл, табанды, өжет келеді. Сол мінез тағдыршешті кезеңдерде шұғыл шешім шығаруға, мұраты үшін жанталаса күресуге, діттеген мақсатына жетпей тынбауға алып келеді.
Қазақстанның тәуелсіздік алғаннан кейінгі отыз жылының саяси, әлеуметтік, мәдени тарихына көз салғанда, біздің қоғамға генератор болған осы тұлғалық мінез екенін аңдаймыз. Бұл мінез Нұрсұлтан Назарбаевта болды. Ол өзі ұмтылған биікке бәрімізді ұмтылдырды. Қоғамды, ұрпақты алға сүйреді. Бірден үлкен мақсаттар қойып, соған жұмыс істеді. Оны Қазақстан халқына жасаған Жолдауларынан көрдік. Әр Жолдауы Елбасы салған жолды айқындай түсті, оның мұраттарын айшықтай түсті. Ол көрген шалғайды кейде біз көре алмаған кездер де аз болған жоқ. Ол байқаған жайттарды дер уақытында байқай алмаған сәттеріміз де болды. Бірақ, осының бәріне қарамастан шын көшбасшылық қасиет өз биігін бағындырды. Сол биік – бүгінгі тәуелсіз еліміздің шыққан биігі.
Біз осы биіктен қарағанда нені көреміз? Күрделі әлемді, күн сайын құбылған дүниені, осы қым-қуыт, қайшыласқан әлемдегі саяси, экономикалық жағдайдың ортасында, жаһанданумен бетпе-бет келе отырып өз жолын табуға, өз бет-бейнесін жасауға, өз үлгісін қалыптастыруға, ұлттық кескін-келбетін, рухани моделін сақтап қалуға ұмтылған жас мемлекетіміздің жанкешті күресін, сол күрестің басындағы Елбасы тұлғасын көреміз.
Бұл күрестің мемлекет пен ұлт тарихындағы, қоғам және жеке адам өміріндегі үлесін, орнын келер ұрпақ айта жатар. Ал біз осы күресті, осы тарихты бірге өткердік. Тәуелсіз қазақ елінің жаңа дәуірін бірге аштық. Әрқайсымыз өз саламыз арқылы жас мемлекеттің іргетасын қалауға атсалыстық. Бұл біздің мойнымыздағы жауапкершілік әрі міндетіміз болды.
Нұрсұлтан Әбішұлы мәдениет пен өнер саласына ерекше қамқорлық көрсетті. Осы саланың өкілі ретінде оны айтпай кетуге, аттап өтуге болмайды. «Мәдени мұра», «Рухани жаңғыру» секілді аса ауқымды бағдарламалар еліміздің мәдени өмірін түбегейлі өзгертті. Сан салалы, алуан соқпақты жобалар жаңа серпін берді, ел руханиятын түлетті. Сананы өзгертті, сапаны көтерді. Мұның жемісін біз ғана емес, әсіресе келер заманның ұрпағы да көреді.
Былтыр, дәл осы күні Нұрсұлтан Назарбаев Президент ретінде өзінің өкілеттілігін тоқтатты. Тұтқиылдан соғып, төтеннен қабылданған тосын шешімдей көрінгенімен, жүз өлшеп, бір кескен, мың түйіп, бір тарқатқан шешім екенін түсіндік. Бұл күн де тарихқа айналды.
Елбасы Қасым-Жомарт Тоқаевтың кандидатурасын ұсынуы халықтың ойынан шықты. Қасым-Жомарт Тоқаев Елбасымен бірге тәуелсіздігіміздің қалыптасуына күш-жігерін салған көрнекті саясаткер. Өзім ерекше сыйлайтын азаматтарымыздың бірі.
Биыл жыл тәуір басталған еді. Әл-Фарабидің 1150 жылдығы, Абайдың 175 жылдығын атап өтіп жатырмыз. Алайда, әлемдегі алуан түрлі жағдай бізді де айналып өтпейді. Соны бірге өткереміз, қиындықты бірге еңсереміз. Халық болып қандай жағдайға да қам қыламыз. Ел аман, жұрт тыныш болсын.
Әкім ТАРАЗИ,
жазушы, Мемлекеттік сыйлықтың лауреаты
