Король сарайында өткен сенім грамоталарды тапсыру рәсімі барысында тараптар өз мемлекеттерінің екіжақты ынтымақтастықты жан-жақты дамыту және тереңдету ниетін растады.
Қазақстан Оңтүстік-Шығыс Азия елдерімен достық қарым-қатынастарды, АСЕАН аймағының жаңа өсіп келе жатқан нарықтарымен сауда-экономикалық байланыстарды дамытуға үлкен мән береді. Бұл туралы Қазақстан Президенті Қасым-Жомарт Тоқаев бірнеше рет атап өткен болатын. Қазақстан соңғы жылдары үздік экономикалық даму динамикасын көрсететіп отырған Камбоджамен қарым-қатынасты жандандыруға берік ниетті, - деп мәлімдеді Қазақстан Елшісі аудиенция барысында.
Камбоджа Королі Нородом Сиамони Қазақстанның әлеуметтік-экономикалық дамуындағы жетістіктерін жоғары бағалай отырып, Қазақстан-Камбоджа қарым-қатынасы үдемелі түрде дамитындығына сенім білдірді. Камбоджа монархы Қазақстан Президенті Қасым-Жомарт Тоқаевқа қошемет сәлемін жеткізу туралы өтініш білдіріп, Қазақстан халқына бақ-береке мен өркендеу тіледі.
Ол сондай-ақ қазақстандық дипломатқа Қазақстан-Камбоджа қарым-қатынастарын нығайту бағытында табысты және жемісті еңбек тіледі.
Сол күні Ерлан Байжанов Камбоджаның Сыртқы істер және халықаралық ынтымақтастық министрінің орынбасары Иэт Сопхиамен кездесті.
Тараптар екіжақты қарым-қатынастардың ағымдағы жай-күйі мен даму перспективаларын, шарттық-құқықтық базаны нығайту қажеттігін талқылап, сауда-экономикалық және мәдени-гуманитарлық байланыстарды кеңейту үшін әлеуеттің бар екенін атап көрсетті. Халықаралық аренада, соның ішінде, АӨСШК және «Азия-Еуропа» форумы шеңберінде екі елдің өзара іс-қимылы мәселелеріне ерекше назар аударылды.