Аурудан айығуға арақ көмектеспейді

Қоғам • 25 Наурыз, 2020

Аурудан айығуға арақ көмектеспейді

Коронавирустық жұқпа өршігелі халықтың арасында ауруды емдеудің небір тәсілдерін ұсынған «ақыл-кеңестер» көбейіп кетті. Кейбіреулер ащы судың да ауруды басуға әсері бар деп ағат ойлап жүр. Дәрігерлердің айтуынша, арақ, керісінше, ағзаны одан әрі улап, дерттен айығуға кедергі келтіреді.

Egemen Qazaqstan

Әлеуметтік желіде таралған жалған ақпараттар талай адамның түбіне жетті. Көптеген аудио, бейнежазбаларда спирттік ішімдіктер вирустың алдын алатыны айтылып жүр. Бұған сенген кейбір аңғал тұрғындар көп мөлшерлі спирттік ішімдіктерден уланған жайы бар. Мысалы, бүгінге дейін Иранда «ауру жоламайды» деген үмітпен спирттік ішімдіктер тұтынған 200-дей адам уланып, қайтыс болған. Өзін-өзі емдеудің құрбаны болғандардың бірі - кішкентай бала. Ата-аналары спиртті өздері ішкенімен қоймай, баласына да берген екен. Соның салдарынан бала көзінен айырылған.

Ғаламтордағы мәлімет бойынша, Шығыс Әзербайжан аймағында алкогольді ішімдіктен 230 адам уланған, оның 20-сы қайтыс болған. Альборзда да 20 адам уланып, өлген.

Коронавирус жұқтырудан қорыққан тұрғындардың ішінде ішуге болмайтын өнеркәсіптік спирт – метанолды қолданғандар да табылыпты. Бұл улы спирттен 7 адамның көз жұмғаны белгілі болды. Тағы төрт адам метанолдың уытынан көруден қалған.

Сондықтан Дүниежүзілік денсаулық сақтау ұйымы алкогольды ішімдіктерден бас тартуға, ресми емес ақпараттарға сенбеуге шақырады. Мамандардың айтуынша, ащы су вирустан қорғамайды, керісінше, ағзаға зиян келтіріп, сауығу процесін кешеуілдетеді. Оның орнына дұрыс тамақтанып, саламатты өмір салтын ұстанған жөн.

Қымбат ТОҚТАМҰРАТ