Жағдайдың ушығып бара жатқанын тілге тиек еткен шаһар басшысы өзінің Instagram парақшасында:
«Құрметті алматылықтар! Коронавирусқа қатысты жағдай біз ойлағаннан әлдеқайда қауіптірек болды. Қауіпті жете түсінбеу – жауапсыздық және қылмыспен пара-пар. Өкініштісі сол, карантинге немқұрайлы қарап, шектеу шараларын сақтамай, халықтың өмірін қауіп-қатерге тіккен жандар азаймай тұр. Жұмысын жалғастырып жатқан спорт залдары мен мейрамханалар, санитарлық нормаларды сақтамаған азық-түлік дүкендері анықталды. Мамандардың сөзіне құлақ аспай, көшеде қыдырып жүрген тұрғындар да бар. Тәртіпке бағынбағандар үшін қатаң шара қолданылады», – деп жазды.
Адамзатқа қатер төндірген індеттен оңбай жапа шегіп жатқан Италия, Испания, АҚШ мемлекеттері азаматтарының жан айқайын жеткізген түрлі бейнежазбалар әлеуметтік желілерде тарап жатыр. Бұл бейнероликтер – мәселенің маңыздылығын ескеріп, сақтық шараларын берік ұстануға үндейді. Қоғамның тұтастығы, мемлекеттің беріктігі, айналып келгенде өз отбасының, жеке басының амандығы үшін азаматтар ағымдағы жағдайдан сабақ алып, қауіпсіздік шараларын қатаң сақтаса игі.
