Енді оқушылар онлайн оқыту жүйесі арқылы білім алмақ. Осы тұста «Оқушылар демалыс уақыттарын қалай өткізуде?» деген сұрақ туындайды. Екі мегополистегі ойын-сауық орталықтары уақытша жабық. Аулада да балалар емін-еркін ойнай алмайды. Бұған дейін олар қосымша сабақтарға, спорттық секцияларға, өнер үйірмелеріне баратын. Қазіргі ахуал қиындау.
Міне, төтенше жағдай кезінде уақытын босқа өткізбей, әр күнін тиімді пайдаланып жүрген Мейірлан Жарылқасын туралы сөз қозғасақ. Ол Алматы облысы, Ұйғыр ауданы, Бахар ауылы А.Розыбакиев атындағы орта мектептің 4-сыныбында оқиды. Өзі спортшы, республика көлемінде өтетін таэквандо жарыстарынан құр қол қайтқан емес. Оқу озаты атанған Мейірлан бүгінде мультфильм кейіпкерлерінің бейнесін ермексазбен қалап, түрлі образдарға айналдыруда. Әр образы ерекше. Мәселен, бала қиялынан туған «Өрмекші адам», «Ержүрек Джон», «Төрт аяқты құбыжық», «Алпауыт дәу» секілді туындылары көпшілікті бейжай қалдырмайды. Ермексазға деген қызығушылығы жеті жасынан оянған Мейірланның ата-анасы оның бұл өнерін шыңдап, алдағы уақытта туындыларын аудан, облыс көлеміндегі көрмелерге жолдамақ.
Ендеше, М.Жарылқасын әлемге танымал М. Антокольским, Альберто Джакометти, Фернандо Ботеро және отандасымыз гиперреалист-мүсінші Айдос Есмағамбетов сияқты мүсіншілердің даңғыл жолын жалғастырмасына кім кепіл?! Болашақта Мейірланның қолынан тек мультфильм кейіпкерлері ғана емес, қазақ халқының ертегілеріндегі ержүрек батырлардың да образдары көркем туындыға айналатынына сенімдіміз.
Айым БОЛАТҚЫЗЫ