Кеше Орталық сайлау комиссиясының Мемлекет басшысының Жарлығымен тағайындалған Парламент Сенатының депутаттарын тіркеу туралы қаулы қабылдаған отырысы өтті. Сондай-ақ ОСК үш әкімшілік-аумақтық құрылымында өткен ауыл әкімдерін қайта сайлаудың бастапқы қорытындыларын жариялады.
Кеше Орталық сайлау комиссиясының Мемлекет басшысының Жарлығымен тағайындалған Парламент Сенатының депутаттарын тіркеу туралы қаулы қабылдаған отырысы өтті. Сондай-ақ ОСК үш әкімшілік-аумақтық құрылымында өткен ауыл әкімдерін қайта сайлаудың бастапқы қорытындыларын жариялады.
Орталық сайлау комиссиясы «Қазақстан Республикасының Парламентi және оның депутаттарының мәртебесi туралы» Конституциялық заңының 24-бабы 1-тармағына сәйкес және «Қазақстан Республикасы Парламентінің Сенаты депутаттарын тағайындау туралы» Президенттің 2013 жылғы 26 тамыздағы №622 Жарлығы негізінде тағайындалған Бірғаным Сарықызы Әйтімованы, Асқар Асанұлы Бейсенбаевты, Сергей Николаевич Громовты, Ләззат Кетебайұлы Қиыновты, Георгий Владимирович Кимді, Дулат Рашитұлы Құсдәулетовті, Серік Нөгербекұлы Нөгербековті және Нұрлан Мірқасымұлы Оразалинді Сенат депутаттары ретінде бекітті. Ортсайлауком төрағасы Қуандық Тұрғанқұлов Қазақстан Республикасы Парламенті Сенатының жаңадан тіркелген депутаттарына жеке куәліктері мен белгіленген үлгідегі омырау белгілерін тапсырды.
Сондай-ақ, Орталық сайлау комиссиясы басшысы тиісті аудандық аумақтық сайлау комиссияларының шешімдеріне сәйкес 28 тамызда Павлодар облысының екі ауылдық округінде және Маңғыстау облысының бір ауылдық округінде әкімдерді қайта сайлау өткені жайынан хабардар ете кетті. Аудандық сайлау комиссияларының алдын ала берген мәліметтерінен қайта сайлауға таңдаушылар толық құрамда қатысқаны белгілі болып отыр. Соның барысында әкімдікке кандидаттардың 4 сенім білдірілген адамы мен бұқаралық ақпарат құралдарының 2 өкілі дауыс беру барысын байқауды жүзеге асырыпты. Дауыс санағы нәтижесінде Павлодар облысы Ертіс ауданының Голубовка ауылы әкімі болып 1957 жылы туған, осы ауылда әкім қызметін атқарған Серік Еркенұлы Нұркин жеңіске жеткен. Оның кандидатурасына депутаттардың барлығы да өз дауыстарын беріпті. Бұл ауданда 12 таңдаушы бар екендігін де айта кеткен жөн. Павлодар облысы Успен ауданының Қозыкеткен ауылдық округінің әкімі болып 1988 жылы туған, бұған дейін «Успен ауданының кәсіпкерлік және ауыл шаруашылығы бөлімі» ММ-нің бас маманы қызметін атқарған Тимур Серікұлы Жанғазинов сайланыпты. Аталған үміткерге 10 (90,9%) таңдаушы өз дауысын бергені мәлім болып отыр. Ал Маңғыстау облысы Маңғыстау ауданының Тұщықұдық ауылдық округінің әкімі болып 1985 жылы туған, бұған дейін Жер қатынастары мен кадастр бөлімінің бас маманы қызметін атқарған Азамат Қомшабайұлы Қойсарин сайланыпты. Оған 12 (100%) таңдаушы дауыс бергені анықталып отыр.
ОСК мәліметтеріне қарағанда, еліміздің аудандық маңызы бар қалаларының, ауылдық округтерінің, ауылдық округтің құрамына кірмейтін кенттері мен ауылдарының 2457 әкімін сайлауға жұмсалған жалпы шығыстар шамамен 370 миллион теңгені құрапты.
Асқар ТҰРАПБАЙҰЛЫ,
«Егемен Қазақстан».
