Хадис-шәріптерде «көршісі аш отырып, өзі тоқ болған адам бізден емес» делінеді. «Бір ағзаның мүшелері іспетті» бір-бірімен тығыз байланысты болған мұсылман қауымы қай кезеңде болмасын «бір жері ауырса, бүкіл дене сезетіндей» жанашырлығымен, қамқорлығымен ерекшеленген.
Сондықтан осынау сын сағатта мейірімі мен жанашырлығы үйлескен атымтай жомарт азаматтардың көптігі қуантады. Сондай қолы ашық, жүрегі кең демеушілердің атсалысумен «Нұр Астана» мешітінің ұжымы жағдайы төмен отбасыларға азық-түлік жағынан жәрдем көрсетті. Мешіттің бас имамы Нұрлан Рамазанов қайырымдылық шаралары алдағы уақытта да жалғасатынын айтты.
