Парламент • 03 Сәуір, 2020

Елге пайдасы тиген адам жақсы

59 реткөрсетілді

Шынын айту керек, коронавирус салған лаң елдің сенімін әрі-сәрі еткені белгілі. Жұрт басының амандығымен әуре болып, енді әлеуметтік көмектер азайып, жеңілдіктер болмайды деп ойлап қалғаны да рас.

Жұмысынан амалсыз айы­рылған, кәсібінен қағылған жұрт не істерін білмей дағдарып қалған болатын. Міне, еліміздегі төтенше жағдайға және мемлекеттің дағдарысқа қарсы іс-шараларына байланысты Президент Қасым-Жомарт Тоқаевтың мәлімдемесі елдің осынау алаң көңілін басып, қандай қиын кезең болса да мемлекет тарапынан қолдау ешқашан тоқтамайтынын анық байқатты.

Шынында қазіргі күрделі жағдай ырғалып-жырғалуды кө­термейді. Нақты әрі батыл әре­кеттер керек. Президенттің мә­лімдемесі сонысымен де маңыз­ды. Енді Үкімет, жергілікті атқа­рушы органдар тапсырмалар­ды тезірек әрі сапалы жүзеге асыруы тиіс. Әрине әр адамның денсаулығы өз қолында. Бұл тарапта мемлекет адам денсаулығын сақтауда барлық мүмкіндікті жасап отыр. Мемлекет басшысы әлемді жайлаған індеттің қоғам дамуына қандай қиындықтар тудырғанын атап өтіп, одан шығудың жолдарын да көрсетіп, мүмкіндіктер жасауда.

Бұл қиындықтан шығу тек мем­­лекеттің ғана міндеті емес. Қиын­­дықты еңсеруге ел азамат­тары­ның барлығы атсалысуы керек. Бірде сүйікті пайғамбарымыз Мұ­хаммедтен (с.ғ.с.) бір кісі: «Уа, Алланың елшісі, ең жақ­сы адам кім?» деп сұрағанда, ол: «Ең жақсы адам – қоғамға, ел­ге пайдасы тиген пенде» деп жауап берген екен. Шынында қазір­гідей қысылтаяң сәтте дүрбелең ту­дыр­май, халық мемлекетке қол­дау көр­сетуі керек. Яғни әр адам­ның қо­ғамға, елге пайдасы тиюі керек.

Жалпы алғанда, елдің эко­но­микалық дамуының локо­мотиві ауыл шаруашылығы саласы екені белгілі. Қазақстан – аграрлық мемлекет. Осыны естен шығармауымыз қажет. Сон­дықтан көктемгі егіс науқа­нын уақтылы өткізу аса маңыз­ды. Бұған бюджеттен 70 миллиард теңге бөлінетін болды. «Көктемнің әр күні жылға азық» деген, Президенттің егіс нау­қанына жасаған қолдауы шаруа қауымның тірлігін баянды әрі табысты ете түсетіні сөзсіз. «Ең­бек етпесең, елге өкпелеме, егін екпесең, жерге өкпелеме» деген, бүгінде дәулетін асырып, асы­ғы алшысынан түсіп отырған шар­­уа­шылықтар жетерлік. Міне, осы шаруашылықтар тіршілігін шашы­ратып алмауы керек.

Қалай айтсақ та, біз тарихы­мызда қандай қиындықтар бол­ғанын түсіну арқылы ғана бола­шақтың қалай болатынын ұғына аламыз. Ендеше қоғамдағы бе­реке-бірлік күш-қуатымызды арттыра түсетіні анық.

 

Әбдәлі НҰРАЛИЕВ,

Сенат депутаты

Соңғы жаңалықтар

Еріктілер балаларды құттықтады

Аймақтар • Бүгін, 16:47

Азияда COVID-19-дан өлім неге аз?

Коронавирус • Бүгін, 16:07

Кім қалай оқып жүр?

Әдебиет • Бүгін, 12:02

Ұқсас жаңалықтар