Парламент • 03 Сәуір, 2020

Құптарлық қадам

20 реткөрсетілді

Мемлекет басшысы Қасым-Жомарт Тоқаевтың республикалық телеарналар арқылы тікелей эфирде жасаған мәлімдемесінен еліміздегі төтенше жағдай және экономикалық-әлеуметтік саладағы дағдарыс қарсаңында қабылданған іс-шаралар жос­парына қанықтық.

Халқымызда «Ауырып ем іздегенше, ауырмайтын жол ізде» деген сөз бар. Ең алдымен, Президенттің қадағалауымен коронавирус індетінің алдын алу іс-шараларының уақтылы қолға алынғанын атап өткім келеді. Елімізге жаманат хабардың алғаш жеткен сәтінен бастап шұғыл түрде шекарадағы бақылауды күшейту, қалаларды карантинге жабу, қоғамдық орындардағы қозғалысты шектеу сияқты қадамдар дер кезінде жасалды. Өйткені біздің елді бүкіл ел болып тойлайтын үлкен мерекеміз Наурыз күтіп тұрған еді. Бұл күндері ежелден келе жатқан салтымыз бойынша алқалаған ағайын бір-бірімен көрісіп, төс қағыстырып, ұлттық мерекеміз ұлан-асыр тойға ұласып жататын еді. Осы мейрамымызды жылдағы дәстүрімен, сән-салтанатымен атап өтетін болсақ, аты жаман індеттің кең таралуына мүмкіндік беріп қояр едік.

Өзімнің мамандығым дәрігер болғандықтан, Мемлекет бас­шы­сының міндетті әлеуметтік медициналық сақтандыру жүйесі бойынша сақтандырылмаған аза­маттардың медициналық көмек алу құқығын 1 сәуірден 1 шілдеге дейін ұзартуды тапсырғанын өте құптарлық іс деп бағалаймын. Бұл МӘМС жүйесін 2020 жыл­дың 1 қаңтарынан бастап енгіз­уіміз керек болған. Бірақ бұл үдерісті бірден енгізу оңай болмайтынын ескеріп, үш айға кейін шегерген еді. Енді мұны қазіргі ахуалға байланысты тағы үш ай қоя тұрамыз. Яғни меди­циналық көмек азаматтарға бұрынғыдай қолжетімді болып қала береді. Себебі аталған жүйе қысылтаяң кезеңде қарапайым жұрттың қалтасына салмақ түсіреді. Бүгінде мемлекет 15 санаттағы азаматтарға әлеуметтік сақтандыру пакетін төлеп беріп отыр. Бұлардың жалпы үлесі – 10,5 млн адам.

Сонымен қатар коро­на­вирустың жер жаһанды жау­лап, өршіп тұрған шағында күн-түн демей, аяғынан тік тұрып қызмет етіп жүрген дәрігер­лерге Президенттің өзі бас болып жасалып жатқан ерекше қам­қорлық пен халықтың қол­дауы өте маңызды. Медицина қыз­мет­керлерінің айлығына үш ай бойы үстемақы қосу туралы шешімнің орынды болғаны анық.

Бастысы, бірліміз бекем болып, қабылданған қауіпсіздік ша­раларын қатаң сақтасақ, адам­заттың басына төнген бұл індет­тің де бетін қайтарып, еңсереміз деп сенемін.

 

Зәуреш АМАНЖОЛОВА,

Мәжіліс депутаты

 

Соңғы жаңалықтар

Ұқсас жаңалықтар