Аймақтар • 05 Сәуір, 2020

Алматыда жұмыссыз режим 13 сәуірге дейін ұзартылды

488 рет
көрсетілді
2 мин
оқу үшін

Бүгін Алматы әкімдігі жұмыссыз режимнің 13 сәуірге дейін ұзартылғанын ресми түрде хабарлады. Осылайша, 5 сәуірге дейін ұйымдардың жұмысын уақытша тоқтату туралы шешім кейінге шегерілді.

Алматыда жұмыссыз режим 13 сәуірге дейін ұзартылды

Мұндай шешімді ҚР Президенті жанындағы төтенше жағдай режимін қамтамасыз ету жөніндегі Мемлекеттік комиссия қабылдады. 

Бұл режим адамдар мен жеке көліктердің қала ішінде қозғалуына тиым салуды көздейді. Азық-түлік пен дәрі-дәрмекті алуға тұрғылықты жерге жақын орналасқан дүкендер мен дәріханаға шығуға рұқсат етіледі. Сондай-ақ, үй жануарларын серуендетуге рұқсат бар. 

65 жастан асқан тұрғындарға далаға шығуға болмайды. Сондай-ақ кәмелетке толмағандар қалада ересектерсіз жүруіне рұқсат жоқ. 

Азық-түлік, дәрі-дәрмек және бірінші кезектегі қажетті заттарды жеткізу қызметтері 9.00-ден 22.00-ге дейін жұмыс істейді. 

Бұл ретте барлық ұйымдар, кәсіпорындар мен қалалық қызметтер жұмысқа тартқан қызметкерлерінің санитарлық жағынан қорғалуын күшейтілген режимде қамтамасыз етуі тиіс. 

Төтенше жағдай режимін бұзғаны және көшеде себепсіз жүргені үшін ескерту, 26510 теңге көлемінде айыппұл немесе 15 тәулікке бас бостандығынан айыру түріндегі әкімшілік жаза қарастырылғанын атап өткен жөн. 

Меншік нысанына қарамастан ұйымдар мен кәсіпорындардың басшылары көпе-көрнеу жалған ақпарат бергені үшін, сондай-ақ қызметкерлерге анықтама бергені үшін және өндірістік немесе қызметтік қажеттілік туындамаған қызметкерлердің қозғалуы туралы деректер бергені үшін қылмыстық жауапқа тартылады.

Шектеу қалалық басқару органдарына, азық-түлік, медициналық нысандарға, қаланың үздіксіз тыныс-тіршілігін және қауіпсіздігін қамтамасыз ететін қызметтер мен БАҚ-қа қолданылмайды.

Алматы қаласы полиция департаментінің мәліметі бойынша, төтенше жағдай режимін бұзғаны үшін ағымдағы жылдың 19 наурызынан бастап 336 адам ҚР ӘҚБтК-нің 476-бабы бойынша әкімшілік жауапкершілікке тартылды, оның 113-і сот шешімімен әкімшілік қамауға алынса, қалғандарына айыппұл салынды.

АЛМАТЫ