Алматы қаласы бойынша қорғаныс істері жөніндегі департаменттің басшысы Амантай Өсербаев арнайы жиынға шақырылған азаматтардың жұмыс орындары толықтай сақталатынын жеткізді. Жұмыс істейтін жандарға жұмысындағы орташа жалақы төленсе, жұмыссыздарға да ең төменгі айлық мөлшерінде (42 500) еңбекақы төленбек. Оның сөзінше, алматыда арнаулы шараға баруға өз еркімен ниет танытып отырғандар аз емес. Айталық бір аптаның ішінде 360 азамат өтінім білдірген.
– Әскери жиынға тек қызметке жарамды азаматтар ғана шақырылды. Олар медициналық комиссияның тексеруінен сүрінбей өткен, 60 жастан аспаған запастағы офицерлер. Әскери есепке алу орындарында кезекке тұрып коронавирус таралуына оңтайлы ахуал тудырмау үшін алдын ала жергілікті әскери есепке алу мекемелеріне телефон арқылы байланысу қажеттігі тұрғындарға барынша ескертілді. Тағы бір айта кетерлігі, арнаулы ережеге сәйкес үш баласы бар әскери міндеттілер аталған шараға шақырылмағанымен, олардың жұбайларының нотариус арқылы келісімі болған жағдайда жиынға баруларына болады, – дейді Амантай Өсербаев.
Бір ай бойы жалғасатын арнайы жиынға әскери міндеттілер өз үйлерінен қатынайды. Мемлекет тарапынан оларға түскі және кешкі ас тегін беріледі. Департамент басшысы кезекті жиынның келесі кезеңдерінің уақыты белгісіз екенін, оны министрлікпен әкімдік белгілейтінін айтты. Осыған дейін қорғаныс министрі қазақстандықтардың неге әскерге шақырылғанын түсіндіріп, олардың немен айналысатынын мәлімдеген болатын.
