Авиация саласының әуесқойлары әлеуметтік желіде әуе кемесінің Алматыға аялдағанын жарыса жазды. Есте болса, аты аңызға айналған ұшақ бұған дейін де Алматы халықаралық әуежайына екі мәрте тоқтаған. Көкті тілген аспан самұрығы алатау баурайына соңғы рет 2015 жылдың желтоқсан айында дамылдаған еді. Украина көлік стратегиясы орталығы хабарлағандай, бұл – Ан-225 «Мрияның» 2018 жылдың күзінен бергі алғашқы сапары.
Әйгілі борт бұл жолы Қытайдың Тяньцзинь әуежайынан короновирус пандемиясына қарсы күрес құралдары мен медициналық жабдықтар тізбегін жеткізу үшін жолға шыққан.
«Әлемдегі ең ірі жүк көлігі Қытайдан 7 млн Р2 маскасы мен жүз мыңдаған қорғаныс костюмдерін жеткізбек. Жеткізу операциясын KGHM Polska Miedź және Grupa Lotos польшалық компаниялары ұйымдастырып отыр» деді әуежай қызметі.
1984-1988 жылдары Киев механикалық зауытында жобаланған аса ауыр жүк тасымалдаушы ұшақты О.К. Антонов атындағы тәжірибелік-конструкторлық бюро жасап шығарған. Сағатына 850 шақырымды артқа тастайтын Ан-225 «Мрия» алғаш рет әуеге 1988 жылдың желтоқсан айында көтерілген.
