Бүгіннен бастап іске қосылған орталық «Шұғыла» шағын ауданы, 347/1 мекен-жайында орналасқан Наурызбай аудандық фронт-офисінің ғимаратында орналасқан.
Заңды тұлғаларға қызмет көрсететін ХҚО дүйсенбі мен жұма аралығында 09.00-ден 16.00-ге дейін жұмыс істейді. Мемлекеттік қызметтерді сапалы және уақтылы көрсету мақсатында, несие беруде оң шешім алған ұйымдардың тізімі бойынша кестемен қызмет көрсетіледі.
Сонымен қатар карантин кезінде санитарлық-эпидемиологиялық режимді сақтау үшін бөлім барлық санитарлық шаралармен қамтамасыз етілген. Сондай-ақ, фронт-офисте қызмет көрсететін мамандардың қауіпсіздігі мақсатында олар жеке қорғану құралдарымен (бетперделер, антисептиктер, қолғаптар) қамтамасыз етіліп, қаладағы шектеу жағдайында жүріп-тұрулары ұйымдастырылған.
Қызмет алушылардың да қызмет алу кезіндегі санитарлық қауіпсіздік шаралары қарастырылған. Қызмет алушылар кезек күтуі үшін арақашықтығы сақталған арнайы сызықтар сызылған. Міндетті түрде бетперде режимі сақталады. Ғимарат ішіне енгенде антисептикті пайдаланып, ары қарай қызмет алуға операторға жүгінеді.
Орталықта көрсетілетін негізгі қызмет түрлері – ауылшаруашылық және агробизнес саласы өкілдеріне арналған жылжымайтын/жылжымалы мүлік кепіл шартын мемлекеттік тіркеу, жылжымайтын/жылжымалы мүлік кепіл шартына қосымша келісімді мемлекеттік тіркеу қызметтері.
«Шағын және орта бизнес өкілдерінің ғимарат ішінде жиналуын болдырмау үшін көрсетілетін қызметті алушылардың назарына құжаттардың толық пакетін ұсыну қажеттілігі туралы ескерте кетсек. Атап айтқанда:
Жылжымайтын/жылжымалы мүлік кепіл шартын және кепіл шартына қосымша келісімді мемлекеттік тіркеу үшін: 2 дана кепіл шарты /2 дана кепіл шартына қосымша келісім/, объектіге байланысты тариф бойынша төлем, егер мүлік некеде сатып алынған болса, ерлі-зайыптының нотариалды куәландырылған келісімі қажет болады», - дейді «Азаматтарға арналған үкімет" мемлекеттік корпорациясы» КЕАҚ Алматы қаласы филиалының директоры Данияр Қырықбаев.
Алғашқы жұмыс күні 4 кәсіпкер толыққанды қызмет алып, қалған келушілердің көпшілігі кеңес алумен шектелді.
Бизнес өкілдеріне арналған ХКО жұмысымен танысқан арнайы мониторингтік топтың мүшесі, қоғам белсендісі Рафаэль Гасанов былай дейді:
«Карантин кезінде экономикамызға көп зиян келмес үшін, және көктем егісі басталу кезінде кәсіпкерлеріміз уақытын жіберіп алмас үшін бизнеске арналған ХҚО-ның жұмыс істеуі үшін атсалысқан едік. Бүгіннен бастап Алматы қаласында шағын және орта бизнес өкілдеріне арналып ХҚО жұмыс істеуде. Бүгін оның жұмысымен танысып көрдік. Талапқа сай, карантин талаптары да қарастырылған».
