Волонтерлер үлестіретін әр қорапта 30 килодан астам азық-түлік бар. Оған бірінші қажеттіліктегі азық-түлік өнімдері, жарма, макарон, күнбағыс майы және шай секілді тауарлар кіреді. Сондай-ақ азық-түлікпен бірге әр отбасына 50 бетперде табысталады.
– Акция аясында 10 000-нан астам әлеуметтік осал санаттағы отбасыларды бірінші қажеттіліктегі азық-түлік өнімдермен және бетперделермен қамтамасыз етеміз. Аталған акция мамыр айының ортасына дейін жалғасады, – деді Jas Otan Жастар қанатының жетекшісі Елнұр Бейсенбаев.
Айта кетейік, бұған дейін елімізде Н.Назарбаевтың бастамасымен «Birgemiz» атты қоғамдық қор құрылған болатын. Е.Бейсенбаевтың айтуынша, өткен аптада аталған қор сатып алған 5 млн қорғаныш бетпердесі еліміздегі Нұр-Сұлтан, Алматы және Шымкент сынды 3 ірі қаланың тұрғындарына таратылып жатыр. Бүгінде 40 000 отбасына 2 млн-нан астам бетперде үлестірілді.
Осынау игі іске еліміз бойынша 3000-нан астам волонтер қатысуда. Олар 19 наурыздан бастап 56 мыңнан астам отбасын бірінші қажеттіліктегі тауарлармен қамтамасыз етуге көмек көрсетті. Күн сайын Нұр-Сұлтан және Алматы қалаларында волонтерлер 1200-ден астам жалғызбасты зейнеткерді ыстық тамақпен қамтып келеді. Сондай-ақ «Birgemiz» қоры бүгінде аз қамтылған 152 000 отбасына 50 000 теңгеден қаржылай көмек көрсетті. Осындай мөлшердегі қаржылай көмекті қор Нұр-Сұлтан және Алматы қалаларының дәрігерлеріне де берді.
