– Облыс әкімінің тапсырмасына сәйкес, дәрігерлерді «Шағала» қонақүйіне орналастыруға шешім қабылданды. Бұл оларға қолайлы жағдай жасау мақсатында қолға алынып отыр. Мұнда 200 медициналық қызметкерге орын бар. Медицина қызметкерлері COVID-19 инфекциясына қарсы күресте күн сайын науқастарға көмек көрсету үшін аянбай еңбек етуде. Біздің міндетіміз – оларға қиын кезекшіліктен кейін жақсы жағдайда демалуға мүмкіндік жасау, - деді Бақытгүл Хаменова.
«Шағала» қонақүйіндегі жайлы орындарға 60-тан астам дәрігер мен жұқпалы аурулар ауруханасының медбикелері, облыстық аурухананың 70-ке жуық медициналық қызметкері орналасады. Сондай-ақ, ақ халаттыларға «Дана» және «Престиж» қонақүйлерінен де қосымша орындар дайындалған.
– Науқастармен байланыста болатын дәрігерлердің қауіпсіздігі үшін аурухана ғимаратын таза және лас аймақтарға бөлу қажет. Бейнебақылауды қамтамасыз ету мақсатында өңір ауруханаларында 100-ге жуық камера орнатылған. Басты талап – камералар санын арттыру. Сондай-ақ, республикалық бас санитарлық дәрігерінің қаулысына сәйкес эпидемиологиялық жағдайды тұрақтандыру үшін басқа да бағыттарды күшейту қажет, - деді Бақытгүл Хаменова.
Оның айтуынша, Президенттің тапсырмасына сәйкес медицина қызметкерлерін қолдау Атырау облысында да жүзеге асырылуда. Коронавирус инфекциясын жұқтырғандарды емдеп жатқан барлық дәрігер үстемақыны толық көлемде алды.
Жолдасбек Көшербайұлы