Ірі қара неден қырылып жатыр?

«Біздің түсінбей отырғаны­мыз, екі аптадай уақыт өтсе де, ауылымызды әлі карантинге жапқан жоқ. Малымыз қырылып жатыр. Қорамызда тігерге тұяқ қалмай барады. Шынын айтсақ, ауылда осы мал үшін отырмыз. Әрі қарай қалай өмір сүреміз?» дейді Көктал ауылының тұрғыны Елена Тойғанбаева.

Ауыл тұрғындарының айтуынша, қазіргі уақытта елді мекенде тосын індеттен арам қатқан ірі қара саны шамамен 200-ден асып кеткен. Бір ғана «Мұхит» шаруа қожалығында 50 бұзау, 20 ірі қара індеттің құрбанына айналыпты. «Бүгін міне, ауданнан, облыстан мамандар келіп, өлген малдарды санап жатыр. Мына індет жанымыздағы «Аян» шаруа қожалығының малынан тарады. Біз бұл шаруа қо­жа­лығына наразылық білдіріп, тиіс­ті орындарға хат жаздық», деді үй телефоны арқылы сөйлескен осы елді­ мекеннің тұрғыны Нәзигүл Шал­ғынбаева. Бұл кісі «Мұхит» шаруа қожалығының жетекшісі Сәрсен Шалғынбаевтың жолдасы екен.

Осы ауылдың тағы бір тұр­ғынымен үй телефоны арқылы сөйлескенімізде бюджеттік мекемеде жұмыс істейтіндік­тен атын атамауымызды өтінді. «Ауылдағы үлкен кісілер мұны аусыл індеті деп болжап отыр. Көкталдағы алғашқы ірі қараның өлімі 9 сәуірде тіркелген. Содан соң екі-үш күн өткеннен кейін ауданнан мамандар келіп, сынама алып кеткен. Ол сынама мұздатқышта сақталып тұрған көрінеді. Ал 21 сәуірде бұзаудан сынама алды. Бұл сынама нәтижесі қалай болар екен деп алаңдап отырмыз. Өйткені ауыл тұрғындары малдары өле бастағаннан кейін әртүрлі дәрілерді өздері еккен болатын», дейді ауыл тұрғыны.   

Айдың-күннің аманында белгісіз індеттің малдарын жайпап бара жатқанына алаңдаған ауыл тұрғындары елді мекенді тез арада карантинге жауып, өлген малдарының шығыны өтелуі керектігін сұрап отыр. Ал жер­гілікті ветеринарлар өлген ірі қарадан сынамалар алынып, тиіс­ті орындарға жібе­ріл­генін, ауыл­ды карантинге жабу-жаппау мәселесі сынама қоры­тын­дысы­нан соң белгілі болатынын айтады.

Көктал ауылында ұялы теле­фон байланысы нашар болған­дық­тан, осы елді мекенде жүр­ген комиссия мүшелерімен сөй­­лесу­дің мүмкіндігі болмады. Ауыл­да қанша мал белгісіз ін­дет­­­т­ің құрбанына айналғанын, ауыл тұрғындарына қырылған ірі қарасы үшін өтемақы төле­ніп-төленбейтінін комиссия анықтайтын болады.   

Шығыс Қазақстан облысы,

Үржар ауданы,

Көктал ауылы