Бүгінгі таңда фермерлер «Қазыбек» базарынан арнайы орын алып, жылыжайдан жиналған көкөністерін арзан бағада саудаға шығаруда. Бұл өз кезегінде қала тұрғындарына азық-түлікті, көкөністерді "Өндірушіден тұтынушыға" принципімен қолжетімді бағада алуға мүмкіндік береді.
Мәселен, тұрғындар делдалдар арқылы қызанақтың келісін 800 теңгеге алса, қазір 350-500 теңгеден, ал қиярды 500 тг орнына 150-300 теңгеден сатып алуда.
Шымкентте жалпы жылыжай көлемі 183 гектарды құрайды. Оның 53 гектары – өнеркәсіптік. Қалада жабық жылыжай кешендердің көлемін арттыру мақсатында көліктік логистикалық аймағы жанынан 136 гектар жер қарастырылып, 100 гектар аумаққа өнеркәсіптік жылыжай кешендер салынбақ.
Сондай-ақ алдағы уақытта жылыжай өнімдерін қаладағы ірі сауда орындарына да тікелей жеткізіп беру мүмкіндіктері қарастырылуда. Бұл жергілікті өнімнің сатылу құнын төмендетіп, жергілікті халықтың көкөністі делдалсыз қолжетімді арзан бағада алуына мүмкіндік береді.
Шымкент
