Қоғам • 29 Сәуір, 2020

Төзім тілекке жеткізеді

22 реткөрсетілді

Елімізде төтенше жағдай енгізілгеніне де бір жарым айдың жүзі болды. Екі дүние арасын бір қадам қылған қатерлі вирусқа қарсы Қазақстан Президенті Қасым-Жомарт Тоқаев қабылдаған қатаң шаралар қысылтаяң кезеңде нәтижесін берді.

Инфографиканы жасаған Амангелді Қияс, «ЕQ»

Әлбетте, бұл кезең тарих үшін қас-қағым сәт болға­ны­мен, жұртшылыққа оңай тиме­ген­діктен жылдар бойы жадыдан өшпейтін, жер-жаһанды да, жан дүниені де өзгерткен, адам­зат рухын жаныған өзгеше уақыт болғаны анық. Бұл кезең Президент айтқандай, төрт қа­бырғаға оқшауланған отбасы­ларға да, қоғам қажеттілігі мен қауіп­сіздігі үшін күн мен түн қа­тып қызмет еткен отандастары­мызға да оңай тиген жоқ. Десе де «көп­пен көрген ұлы той» деме­к­ші, ел-жұртымыз бұл сынақта да жұмыла білді.

«Ауру атанды да жығады» деген сөз бар. Ал биылғы індет бүкіл дүниені бүк түсірді. Адамдар табысынан айрылды, нәпақасыз қалды, кәсіпорындардың кө­бі кілт тоқтады, экономикалар тұралады. Қазір жаһан жұр­ты пандемия­дан кейінгі сын-қа­терлерге қарсы күреске де бас қа­ты­рып жатыр. Осылайша асқынған ауру насырға шабатынын анық көрсеткен COVID-19 індетімен күрестің соңы ұзаққа созылатын сыңайлы.

Төтенше жағдай жарияланған 16 наурыздан бері Мемлекет басшысы Қасым-Жомарт Тоқаев халыққа бір рет Үндеу, екі мәрте мәлімдеме жасаса, Тұңғыш Президент – Елбасы Нұрсұлтан Назарбаев та қиын сәтте қолдау көрсетуге үндеген Үндеуі мен «Бірлесе білген ел бәрін жеңеді» атты мақаласын жариялады. Ақылды басшы алдырмас деген, төрелі жерге ел тоқтады. Қа­сық­тан қағылып, қасірет шеге­тін азаматтар қай елде де бар. Алайда осы бір күрделі сәтте қо­ғам болып қозғалып, қайырым­­ды­лықтың сан үлгісі салтанат құр­ғанына куә болдық. Мемлекет әр азаматты назардан тыс қалдыр­майтынын дәлелдеді. 4,5 млн-ға жуық азаматқа қар­жы­лай көмек көрсетілді, 500 мың­нан астам адамға азық-түлік таратылды. Азаматтардың несие­лері шегерілді, орта және шағын кә­сіпкерлер уақытша салықтан боса­тылып, жеңілдіктерге ие бол­ды. Шаруа адамдарына арзан­датылған дизель отыны мен тұқым сатып алуына, басқа да қа­жет­тіліктеріне қаржы бөлінді. Мұның барлығы ел қазынасына 6 трлн теңгеге түсіп отыр. Бұл – қомақ­ты қаражат. Коммуналдық тө­лемге де көмек көрсетілуде. Ел­басы бастамасымен құрылған «Бір­геміз» қорынан қаржы бө­лінді. Nur Otan партиясы бар­лық өңірде белсенді жұмыс жүр­гі­зуде. Еліміздің маңдайалды ауқат­ты­ларынан бастап арнайы қорға ақша­ларын аударды. Одан орта буын­дағы кәсіпкерлер мен қара­пайым азаматтар да қалыс қалмай, барымен бөлісіп, қолынан келгенше жәрдемдесті.

Осылайша, жиналған азық-түлік қоры мен алғашқы қажеттілікке енетін әлеуметтік тұрмыстық тауарлар себеті әр үйге дейін еріктілердің көмегімен жеткізілуде. Әсіресе, қатерлі дертпен бетпе-бет келген медицина мен қашықтан қызмет етіп жатқан білім саласының қызметкерлеріне құрмет арта түсті. «Әр істің қайыры бар» дегенді қазақ осындайда айтса керек. Бұл індеттің қыспағында да ізгіліктің толастамайтынын, адам адамға пана екенін аңғартты.

Әсте, адам шыдағанға құрыш шыдамайды. Президент кешегі халыққа арнаған мәлімдемесінде «Төзім тілекке жеткізеді» деген толымды сөз айтты. Сондықтан қазақстандық истеблишменттің төтенше жағдай режімін 11 мамырға дейін созуы мен содан кейінгі мерзімде де сақтық шараларын сақтап, сабырлыққа шақыруы халық тарапынан да құпталып отыр. Өйткені, кез келген ел үшін ең басты құндылық – адам. Ал адам денсаулығы – мемлекеттің де сау-саламаттылығының көрсеткіші. Осы орайда Президент халықтың санитарлық қауіпсіздік пен жауапкершілікті босаңсытып алмауынан бөлек, Үкіметке халық денсаулығы және денсаулық сақтау жүйесі туралы жаңа кодексті жетілдіре түсетін ұсыныстар енгізуді тапсырып отыр. Бұл ретте індетпен күресте отандық ғылымды ілгерілетудің де орайы келіп тұр. Яғни қазақстандық ғалымдарға иммунобиологиялық препараттарды әзірлеуде қолда бар мүмкіндіктерді пайдалану және отандық өнімге басымдық беру қажеттігі айтылды. Сондай-ақ Үкімет пен Ұлттық банкке дағдарыстан кейінгі кезеңге дайындалу, экономиканы қалпына келтіру жоспарын әзірлеу жүктелді.

Емнің алды – еңбек. Қазір қазақстандықтар қоғамдағы қалыпты тіршілігіне қайта оралуды тағатсыздана күтуде. Бұл үшін бір ғана шарт бар – босаңсымау. Иә, бір өкініштісі, «көзі ауырған күнді көрмейді» дегендей, қазір жер әлем жасарып, жан-жақ жасыл түспен жасанғанда, жан-дүниең сол ғажап әлемнің аясынан қатер күтіп, жасқанып тұратын болды...

Соңғы жаңалықтар

Азияда COVID-19-дан өлім неге аз?

Коронавирус • Кеше

Ұқсас жаңалықтар