Қазақстан халқының бірлігі күні «Хазар» әзербайжан мәдени орталығы аз қамтылған отбасылар, тыл ардагерлері, көп балалы аналар мерекені сезінуге мүмкіндік алуы үшін 20 отбасына мерекелік азық-түлік таратты. Азық-түлік себетінде әзербайжан тағамы – шах-палау және азық-түлік өнімдері бар, деп хабарлайды қала әкімдігі жанындағы «Қоғамдық келісім» КММ баспасөз қызметі.
«Төтенше жағдай мен карантин режиміне байланысты қазақстандықтардың көбі жұмыссыз. Дәл осы қиын-қыстау кезде біз бір-бірімізге жәрдемдесіп, көмек қолын созуымыз керек. Қазақстан халқы Ассамблеясының «Хазар» әзербайжан мәдени орталығы мен «Sahil» мейрамхана кешені де қайырымдылық шараларынан тыс қалмады. Азық-түлік себеті мен жеке гигиена заттарынан бөлек, мейрамханамыз Қазақстн халқының бірлігі күніне орай әзербайжан асханасының басты тағамы – шах палау дайындады. Бұл мерекелік тағам бүгін көмекке мұқтаж отбасылардың дастарханында болғанын қаладық. Қазір бүкіл әлем індетпен күресуде. Оның ішінде Қазақстан да бар. Біздің күшіміз – бірлікте! Біз біргеміз!», – дейді ҚХА мүшесі, «Хазар» әзербайжан мәдени орталығының өкілі Сайяф Исмаилов.
Акция ұйымдастырушылары тізімге сәйкес мерекелік сыйлықтар таратты. Елордалық ҚХА меценаттары мұқтаждарға үнемі көмек көрсетеді.
