Бұрнағы күні түнде Грекияның Салоники қаласында жергілікті ПАОК-пен Еуропа лигасының топтық кезеңіндегі бірінші матчын өткізген Қарағандының «Шахтері»1:2 есебімен ұтылып қалды.
Бұрнағы күні түнде Грекияның Салоники қаласында жергілікті ПАОК-пен Еуропа лигасының топтық кезеңіндегі бірінші матчын өткізген Қарағандының «Шахтері»1:2 есебімен ұтылып қалды.
Жерлестеріміз төрешінің қосқан соңғы екі минуттық қосымшасында бір гол жіберіп алып, кездесудің қорытындысында жеңілуге мәжбүр болды. Ал алаңдағы ойын көп уақыт екі команданың тең дәрежедегі текетіресі жағдайында өтіп жатты. Соған қарамастан, қарсыластар үзіліске осылай есеп аша алмаған күйлері шықты. Ал 49-минутта гректер өздерінің айып алаңдарына келген Рохер Каньясты қағып құлатты. Пенальти! Оны жәбір көрушінің өзі жүзеге асырды.
Жасыратыны жоқ, қарағандылықтар осыдан кейін ойнамай қойды. Шамасы, осы есеппен матч соңына дейін жетеміз деп ойласа керек. Бірақ олай болмай шықты. Өз алаңында ұтылып қалу қаупі туған гректер енді жанталаса алға ұмтылды. Осы ұмтылысты олар екі рет голға айналдыра білді. Бұлардың біріншісін 75-минутта Стефанос Атанасиадистің көмегімен түсірген олар ойынға қосылған екінші минутта жеңісті де біржола тартып әкетті. Оның ретін матч бітуге 5 минут қалғанда алаңнан көрінген Звонимир Вукич келтірді.
Осылайша «Шахтер» қосымша қосылған уақытта жеңіліске ұшырады.
Топтың келесі туры ойындары 3 қазан күні ойналады. Бұл күні қарағандылықтар Израильдің Хайфа қаласының «Маккаби» командасын қабылдайды.
Руслан ИГІЛІК.
