Премьер-Министр Асқар Мамин облыс әкімі Өмірзақ Шөкеевпен бірге Түркістан облысы Мақтаарал ауданы Мырзакент кентінде ауыл тұрғындарымен кездесті. Онда эвакуацияланған мақтааралдықтардың алғашқы легі Әлішер Усмановтың қорынан бөлінген қор қаражатының сертификатын алды.
Бұл қаражат эвакуацияланған 5202 отбасының жеке шотына түседі. Қазіргі уақытта қаражат алатын барлық азаматтардың құжаттары қабылданып жатыр. Құжаттар толық жиналған кезде, әр отбасы өздеріне тиесілі қаржыны ала алады.
Ресей кәсіпкері Әлішер Усманов су тасқынынан зардап шеккен Мақтаарал ауданының эвакуацияланған тұрғындары үшін «Түркістан» әлеуметтік даму корпоративтік қорына 5,2 млн доллар аударған болатын. Бұл 2,3 млрд теңге 30 420 адамнан тұратын 5202 отбасының әр қайсына 422 мың теңгеден (1000 АҚШ доллары) үлестіріледі.
