Ұлы ақын һәм ағартушының 175 жылдығына арналған онлайн басқосуға отандық және шетелдік абайтанушы ғалымдар мен ғылыми-зерттеу мекемелерінің қызметкерлері қатысады.
Қыздар университетінің Қазақ әдебиеті кафедрасының мұрындық болуымен ұйымдастырылатын конференция жұмысы үш секция бойынша жүргізілмек. Атап айтқанда, жиын қатысушылары «Абайдың әдеби мұрасы: тарихы және зерттелуі», «Абай даналығы және ұлттық рухани құндылықтар» және «Абайтану» пәнін оқытудың өзекті мәселелері» бағыттары бойынша келелі ойларымен бөлісіп, баяндамалар жасайды.
– Конференцияның басты мақсаты – әлемдік деңгейде танылған ұлы ақын мұраларындағы әрбір сөзді санаға сіңіру, барша отандастарымыздың және түркі халықтарының бойында ұлттық рухани құндылықтарды қалыптастыру. Сонымен қатар адамзаттың ақылманына айналған ойшылдың шығармашылық мұрасын да дәріптеуді көздеп отырмыз. Хәкімнің дана ойлары мен поэзиясы әлемдік әдеби қазынаға қосылған теңдессіз байлық екенін тағы да дәлелдегіміз келеді, – дейді Қазақ әдебиеті кафедрасының меңгерушісі Болатхан Сарбасов.
Жиында «Еуразия перспективасы» компаниясының президенті Зифа-Алуа Әуезова, Түркияның Мугла Сыткы Кочман университетінің профессоры Икрам Аян, Польшаның Варшава университетінің докторанты Жандос Каринбаев, М.Әуезов атындағы Әдебиетжәне өнер институтының Абайтану және жаңа дәуір әдебиеті бөлімінің меңгерушісі Серікқазы Қорабай, Абайдың «Жидебай-Бөрілі»мемлекеттік тарихи-мәденижәне әдеби-мемориалдыққорық-музейінің директоры Шанбай Тұрдықұл, С.Аманжолов атындағы Шығыс Қазақстан мемлекеттік университетінің Абайтану ғылыми-зерттеу институтының директоры Айжан Картаева, Қазақ ұлттық қыздар педагогикалық университетінің профессоры, абайтанушы ғалым Руда Зайкенова және тағы да басқа ізденушілер тақырып төңірегінде мазмұнды ой айтып, пайымды пікір білдірмек.
Сондай-ақ конференцияға Түркияның Еге университеті, әл-Фараби атындағы Қазақ ұлттық университеті, Абай атындағы Қазақ ұлттық педагогикалық университеті, Сулейман Демирел атындағы университет, Шәкәрім атындағы Семей мемлекеттік университеті, І. Жансүгіров атындағы Жетісу мемлекеттік университеті, Қорқыт Ата атындағы Қызылорда мемлекеттік университеті, Арқалық мемлекеттік педагогикалық институты, Х. Досмұхаметов атындағы Атырау мемлекеттік университеті, «Қайнар» академиясы және Еуразия гуманитарлық институтының оқытушылары мен жас ізденушілері қатысады.
– Абай мұрасы рухани құндылықтардың қайнар көзі, ұлттық сананы жаңғыртудың негізі. Абайдың шығармаларын ұлықтау мақсатында мұндай шаралардың өткізілуі – заманауи қазақ елінің дамуына жол ашпақ. Хәкімнің 175 жылдық мерейтойын жоғары ұйымдастырушылық және мазмұндық деңгейде мерекелеуді қамтамасыз ету – уақыт талабы, – дейді конференция ұйымдастырушылары
АЛМАТЫ
