Қай халықтың болмасын әдебиеті мен өнері сол жұрттың мәдениетінің қайнары, тереңге бойлаған рухани тамыры екені ақиқат. Сол рухани тамырды тамыршыдай тап басып халқының мәдениеті мен өнерін өрге сүйрер даналар қай халықта да бар десек, қазақ жұртының жоғын іздеп, қиын-қыстау кезеңдерде еліне тұтқа бола білген атпал азаматымыздың бірі де бірегейі Мағжан Жұмабаев екені белгілі. Мағжан Жұмабаев шығармашылығына ең алғаш баға бергендердің бірі Мұхтар Әуезов Мағжанның сөзінің болашаққа анық жететіндігін тілге тиек етсе, көркем сөз шебері Жүсіпбек Аймауытов «...ол сыршыл, толғағыш, суретші, сөз ұстасы, түршіл, романтик, мәдениетшіл, күншығысшыл ақын», деп шынайы бағасын береді. Ал Елбасымыз Нұрсұлтан Назарбаев өзінің «Тарих толқынында» кітабында Мағжанның мөп-мөлдір асыл лирикасы ынта-ықылас қойған әрбір адамның ішкі жан-дүниесін байыта түсетінін атап көрсеткен.
Қай халықтың болмасын әдебиеті мен өнері сол жұрттың мәдениетінің қайнары, тереңге бойлаған рухани тамыры екені ақиқат. Сол рухани тамырды тамыршыдай тап басып халқының мәдениеті мен өнерін өрге сүйрер даналар қай халықта да бар десек, қазақ жұртының жоғын іздеп, қиын-қыстау кезеңдерде еліне тұтқа бола білген атпал азаматымыздың бірі де бірегейі Мағжан Жұмабаев екені белгілі. Мағжан Жұмабаев шығармашылығына ең алғаш баға бергендердің бірі Мұхтар Әуезов Мағжанның сөзінің болашаққа анық жететіндігін тілге тиек етсе, көркем сөз шебері Жүсіпбек Аймауытов «...ол сыршыл, толғағыш, суретші, сөз ұстасы, түршіл, романтик, мәдениетшіл, күншығысшыл ақын», деп шынайы бағасын береді. Ал Елбасымыз Нұрсұлтан Назарбаев өзінің «Тарих толқынында» кітабында Мағжанның мөп-мөлдір асыл лирикасы ынта-ықылас қойған әрбір адамның ішкі жан-дүниесін байыта түсетінін атап көрсеткен.
Биыл осындай кемеңгер ақын Мағжан Жұмабаевтың туғанына 120 жыл толып, ел-жұрты мәртебесін асырып жер-жерде атап өтті. Осыған орай ел көлемінде біраз игілікті шаралар да жүзеге асырылды. Мәселен, Қазақстан Республикасының Ұлттық банкі 2013 жылғы 28 мамырдан бастап номиналдық құны 50 теңгелік Мағжан Жұмабаевтың 120 жылдығына арналған ескерткіш монетаны айналысқа шығарды. Сол сияқты, «Тұранфильм» студиясы түсірген ақынның өмірін, шығармаларын, азаматтық бет-бейнесін бейнелейтін кинотуындыны ел-жұрты жылы қабылдаса, Мәдениет және ақпарат министрлігі мен Солтүстік Қазақстан облысының әкімдігі бірлесіп «Мағжан көктемі» II республикалық өнер фестивалін өткізді.
Мағжан Жұмабаевтың өшпес өнегелі мол мұрасымен ел-жұрты тәуелсіздік алғаннан кейін ғана толыққанды таныса алғаны белгілі. Шығармалары бірнеше том болып оқырманымен қауышса, сондай игілікті шаралардың бірі – «Мағжан» атты журналдың жарық көруі еді. Осыған орай елордадағы Ұлттық кітапханада «Мағжан» журналының алғашқы санының шығуына байланысты тұсаукесер рәсімі болып өтті. Оқырман қауым алдында алғашқы болып сөз алған Парламент Сенатының депутаты Қуаныш Айтаханов: «Тәуелсіздік алғаннан кейін біз тарихымыздағы ақтаңдақтарды ақтарып, бұрын білмей келген тарихшыларымызды, көсемдерімізді, хандарымызды, шешендерімізді, небір дүлдүл ақын-жазушыларымызды қайта тірілттік. Солардың бірі де бірегейі Мағжан Жұмабаев болып табылады. Біздің ұрпақ Мағжан Жұмабаевты, әрине, білген жоқ. Мағжан Жұмабаев қазақтың ұлы ақыны, ұлт тағдырының жыршысы» дей келіп, «Мағжан» журналының жарыққа шығуына қамқорлық жасаған Солтүстік Қазақстан облысының әкімі Самат Ескендіровке көпшілік атынан рахмет айтып, бүгін бір облыстың күшімен шығарылып отырған журналды республика көлемінде шығарсақ та артықтық етпейді деді. Одан кейін сөз алған қоғам қайраткері, белгілі ақын Кәкімбек Салықов қолға алған игілікті шара ұзағынан сүйіндірсін дей келіп, журналдың әлі де көлемін қалыңдата түсіп, ғылыми дәрежесін жоғары деңгейге көтере түсу керектігіне тоқталып, басылымның еліміздің барлық аймақтарына таралуына күш салу керектігіне тоқталып өтті. Мәжіліс депутаты, белгілі қаламгер Алдан Смайылдың Мағжан есімін студенттік шағында алғаш естігендігі жөніндегі әңгімесі әсерлі шықса, педагогика ғылымдарының докторы, ұстаз Күлтас Құрманбай қатысып отырған жастарға қарата Мағжан аталарының өлеңін оқыңдар, ол кісі махаббатты шегіне жеткізе жырлаға н дүлдүл ақын деп ағынан жарылды. Заң ғылымдарының докторы Бекет Тұрғараев «Мағжан» журналының жарық көруін еліміздің әдеби, мәдени өміріндегі елеулі оқиға деп бағалады.
Сондай-ақ, бас қосуда филология ғылымдарының докторы, ғалым Серік Негимов, ақын, Мемлекеттік сыйлықтың лауреаты Несіпбек Айтұлы, филология ғылымдарының докторы, жазушы-ғалым Тұрсын Жұртбай, басқа да сөз алған азаматтар қалың оқырманмен қауышып отырған әдеби-көркем, қоғамдық-саяси «Мағжан» журналына ізгі тілектерін білдіріп, өз ой-пікірлерін ортаға салды. Кешті Қазақстанның еңбек сіңірген қайраткері, жазушы Баянғали Әлімжан жүргізіп отырды.
Берік САДЫР,
«Егемен Қазақстан».
–––––––––––––––
Суреттерді түсірген
Ерлан ОМАРОВ.
