2020 жылғы бұл сыйлыққа барлығы 150 өтінім келіп түскен. Ресейдің 18 қаласынан және Украина, Белоруссия, Латвия, Германия, АҚШ елдерінен де үміткерлер бар.
«Заманауи орыс прозасы» («Современная русская проза») номинациясына бүгінгі қоғамның тынысын аша алған һәм осы заманның кейіпкерлерін жасай алған қаламгерлер таңдалып алынбақ. Бұл номинацияның басты жүлде қоры 3 миллион рубльді құрап отыр. Шорт-параққа енген авторлар аталған сумманы 1 миллионнан бөліп алмақ.
«Заманауи орыс прозасының» толық тізімі маусым айында жарияланбақ, ал шорт-парақ қыркүйек айына жоспарланса, марапаттау рәсімі қазанда болады деп күтілуде.
Еске сала кетейік, «Заманауи орыс прозасы» номинациясының лауреаттары әр жылдары Сергей Самсонов, Ольга Славникова, Андрей Рубанов, Наринэ Абгарян, Александр Григоренко, Гузель Яхина, Евгений Водолазкин атанған болатын. «Ясная Поляна» әдеби сыйлығы 2003 жылдан бері табысталып келеді және қазір «Заманауи орыс прозасы», «Шетел әдебиеті» номинацияларындағы үздік көркем шығармаларға беріліп жүр.
