Бір ерекшелігі, аталған ұжымда қазақ, орыс, ұйғыр, түрік, дүнген, неміс, корей ұлттарынан шыққан жастар жұмылып, тату-тәтті еңбек етіп жатыр. «Береке бастауы – бірлік, ұжымдағы тату тірлік» қағидасын ұстанған филиал мамандары, қазіргі қиын кезеңде де бір-біріне қолдау білдіріп, қиындықты бірлесе еңсеруге күш салуда. Карантин кезінде қашықтан, бір-бірінен оқшау жұмыс істегенімен, тілегі мен ниеті бір екендігін бейнетаспаға жазып жеткізіп жатады.
Мәселен, Әуезов аудандық фронт-офисінің маманы, І топтағы мүгедек Лариса Козина: «Мен де Отанымның бір бөлшегі ретінде өз орнымды тауып,еңбек етіп жатқаныма қуаныштымын. Қолдау көрсетіп отырған ұжымыма алғыс білдіремін» десе, Жетісу фронт-офисінде еңбек ететін түрік ұлтының өкілі Бешли оғлы Тюркан Мамедқызы да еліне, ұжымына деген алғыс сезімін былай жеткізеді.
«Ең бастысы, елімізде сыйластық бар. Сонымен бірге қандай бастама, ізгі іс болмасын адамның ұлтына қарамастан қолдап, нәсіліне қарап емес, іскерлігіне қарай бағаланады. Туған жердің төсінде, құшағын жайған бейбіт елде әрқайсымыз өз үлесімізді ел бірлігінің сақталуына, бейбіт те мазмұнды өмір кешуімізге атсалысып жатқанымызға қуанамын. Бұл орайда өзім еңбек ететін ұжымымды ерекше мақтан тұтатынымды, барлық жағдайда бірге екендігімізді жеткізгім келеді», дейді.
Жетісу аудандық фронт-офисінде қызмет ететін Марина Рахымбаева түрлі ұлт өкілдері бірігіп, жұмыла жұмыс істеп жатқан ұжымы туралы айтып берді. «Біз бір елде өмір сүріп, бір жердің суын ішіп, ауасын бірге жұтып жүргендіктен – тағдырымыз бір бауырлармыз. Қазіргідей ауыр кезең біздердің бір-бірімізге деген достық сезімімізді одан әрі жақындастыра түсуде. Мен ұжымдастарыма «Біз бәріміз біргеміз!» дей отырып, жүрекжарды лебізін жеткізгім келеді», дейді.
Бостандық ауданындағы фронт-офисте көп жылдан бері еңбек ететін украин қызы Ирина Кухарская да халыққа қызмет ететін кездің келгенін айтады. «Қазіргі уақытта Қазақстан бүкіл әлем сияқты күрделі кезеңді бастан кешуде. Бірлігі жарасқан көпұлтты Қазақстан халқы бұл қиындықты да еңсереміз! Өйткені – біз біргеміз!», дейді жас қызметкер.
– Ел басына күн туған қилы замандарда да халқымызды ұлт ретінде сақтап қалған – ынтымағы мен бірлігі. Жаугершілік заманда басы ауған жаққа көшіп жүріп те берекесі мен қазанын ортайтпаған қасиетті қанағатшыл халқымыз, бұл қиындықты да еңсерері сөзсіз. «Бірлік бар жерде – тірлік бар» демекші, «Азаматтарға арналған үкімет» мемлекеттік корпорациясының жастары ел басына күн туған сын сағаттарда бірлігін де, тірлігін де көрсетіп отыр, – дейді Алматы филиалының PR-менеджері Жаңыл Әпетова.
АЛМАТЫ
