ӘЛЕМ КУБОГЫ

Қазақстанға келе жатыр Дүниежүзілік футбол додасы­ның ең басты жүлдесінің Қазақ­станға ат басын тіреуіне “Coca Cola” компа­ниясы ықпал етіп отыр. Өйткені, бұл компания сонау 1950 жылдан бастап әлемдік теңбіл доп дода­ларында жарнама жасап қана қой­май, әуесқой футболдан бастап бар­лық деңгейде өтетін жарыстардың басты демеушісі болып табылды. Аталмыш компания ұйымдас­тырып отырған айтулы шара біздің елімізден де бөлек, 9 ай бойы 225 тәу­ліктің ішінде әлемнің 86 елінің 89 қала­сында өтпек. FІFA Әлем Кубогы­ның тарихтағы ең ірі сапарының ұзақтығы 134 017 шақырымға созы­латын болады. Бұл – Жер шарын үш рет айналып шығуға болатын қашықтық. Сом алтыннан құйылған Кубок­тың биіктігі 36,8 сантиметр, жалпы салмағы 6 кило 175 г. Қазақстанға келе жатқан Кубок оның жасанды көшірмесі емес, дәп өзі. Міне, осындай нағыз бас жүлденің ең ірі тарихи сапары өткен жылдың қыркүйегінде FІFA-ның штаб-пәтерінен басталған-ды. Әлем Кубогы жоғарыда атап өткендей, 86 мемлекетті кезегімен аралап, үстіміздегі жылдың 4 мамырында чемпионат өтетін Оңтүстік Африкаға табан тірейді. Айтқандай, Кубоктың саяхаты штаб-пәтерден бастап, бүкіл бағыт бойымен діттеген жеріне жеткенше аса жоғары қауіпсіздік шаралары­мен қамтамасыз етілуде, өйткені, тарихта әйгілі трофейді ұрлауға екі рет әрекет жасалғаны белгілі. Дәстүрлі тур FІFA және FІFA-ның ең байырғы серіктесінің бірі “Coca Cola” компаниясымен ерек­ше ынтымақтастықта жүзеге асып отыр. Бұл тур 2006 жылы өткізілген алғашқы әлемдік сапардың жалға­сы, ол кезде Кубок 29 елдің 31 қаласына ат басын тіреп, 102 570 шақырым жолды жүріп өтіп, футболдың миллиондаған жан­күйері әлемнің ең танымал жүл­десін жақыннан тамашалауға мүм­кіндік алған-ды. Ал қазірге Қазақстанға тиесілі оқиғалар легі мынадай. Наурыздың ортасында FІFA Әлем Кубогы біздің елге келе жатқаны туралы алғашқы баспасөз мәслихаты өтсе, сәуірдің 2-сі күні Алматыдағы Абай даңғы­лындағы Орталық стадионға кіре берісте арнайы таблоның тұсаукесер рәсімі болып өтті. Бұл кері есептеу таблосы Кубоктың Қазақстанға келуі­не қанша күн қалғанын әйгілеп тұр. Аталмыш компания Кубоктың Қазақстанға сапарына орай, астана­лық “Локомотив” футбол клубы­ның шабуылшысы әрі Қазақстан ұлттық құрамасының мүшесі Сергей Хижниченконы ерікті елші ретінде таңдаған. Сонымен, FІFA Әлем Кубогы­ның түпнұсқасы кезекті рет алда Оңтүстік Африканың Йоханнесбург қаласындағы “Soccer Cіty” ста­дионын­да өткен додада жеңіп шық­қан елдің құрамасына тапсыры­лады. Жеңімпаздар кейінгі жарысқа дейін оны өздерінде сақтайды және марапатқа таза алтыннан жасалған кубокты емес, оның жұқа алтыннан жасалған көшірмесін алады. Табанына екі қабат малахит салынған трофейдің түбіне 1974 жылдан бері футболдан Әлем Кубогына ие болған елдердің аттары мен жылдары ойып жазылған. Ал биыл ақтық сынға жолдама алған 32 команда тұңғыш рет Африка құрлы­ғында бас трофей үшін барларын салатын болады. Олардың қайсысы­ның аты Кубоктың табанына мақтанышпен қашалатынын алдағы уақыт көрсетеді. Айнаш ЕСАЛИ. АЛМАТЫ.