Әлем • 20 Мамыр, 2020

Абай шығармалары қырғыз тіліне аударылды

527 рет
көрсетілді
1 мин
оқу үшін

Абайдың өлең-жырлары мен поэмалары қырғыз тілінде жарық көрді. Бұл туралы Халықаралық Түркі академиясының президенті Дархан Қыдырәлі хабарлады.

Абай шығармалары қырғыз тіліне аударылды

«Халықаралық Түркі академиясының ұйытқы болуымен Абайдың өлең-жырлары мен поэмалары қырғыз тілінде жарық көрді. Бауырлас елдің байтағы Бішкекте жарық көрген бұл басылымның академиялық алғашқы жинақ екенін айта кету керек.

Бұған дейін Алатаудың аржағында Абайды қырғызша сөйлеткен ақындар аз болмаған. Ұлы ақынды алғаш қырғыздың классик ақыны Жомарт Бөкөнбаев 1930 жылдардың соңында қотарған көрінеді. Содан кейін академик, Еңбек ері, атақты Аалы Тоқомбаев бастап, Қырғыз елінің батырлары Сооронбай Жусуев, Сүйінбай Эралиев, ел ақындары Жалил Садыков, Сүйерқұл Тургунбаев, Омар Сұлтанов, Жолдошбай Абдыкалыков, Түгелбай Қазақов, Керимбек Кадыракунов сынды ақындар жалғаған аудармашылар тізімін қазақ пен қырғызға дәнекер болып жүрген Perizat Almaz Kyzy қарындасымызға дейін әкелуге болады», - деп жазды Дархан Қыдырәлі Facebook парақшасында.

Оның айтуынша, жаңа академиялық жинақта жоғарыда аталған атақты ақындардың ең таңдаулы аудармалары таңдап алынып, оларға түсініктеме жазылып, ойшыл ақынның жырлары кезінде Мұхтар Әуезов түзген хронологиялық жүйемен берілді.

«Машақатты жұмысты үйлестіріп, бүкіл аудармаларды салыстырып, оларға ғылыми түсініктер жазған белгілі қырғыз ақыны Керімбек Қадырақунов пен академия қызметкері, профессор Қадыралы Қоңқабаев ағама алғыс айтамын! Ұлы Абайдың әдеби мұрасы бірлігі жарасқан бауырлас елдің рухани байланыстарын бекемдей берсін!», - деп жазды Дархан Қыдырәлі.

123