Шетелдерде тіркеуде тұрған көліктерді тізгіндеген жастарға желік бітіп, жол үстінде ойына келгенін істейді. Жылдамдықты шектен тыс арттырады. Жаяу жүргіншілерге қауіп төндіреді.
Бұрнағы күні полиция қызметкерлері Атырау қаласында «Intercoptor» автоматтандырылған бақылау жүйесінің көмегімен сондай екі автокөліктің жүргізушісін анықтады. Өйткені, олар көптен бері аса ірі мөлшердегі айыппұлды төлемей жүр еді.
– Полицейлер «Кордон» фоторадар кешенінің көмегімен 18 мамырда бұл көліктерді қала көшелерінде тоқтатты. Оның бірі –«Opel Astra» көлігінің жүргізушісіне жылдамдықты 116 рет арттырғаны үшін 1 млн 117 мың 886 теңгенің айыппұлы салынған. Ал, екіншісі «Daewoo Nexia» көлігімен қозғалыс ережесін 20 рет бұзғаны үшін 173 625 теңге айыппұл арқалаған еді. Олардың айыппұлы толық төленгенше, көліктер айып тұрағына қойылды, - деп хабарлады облыстық полиция департаментінің баспасөз қызметі.
