Салық кодексіне ұсынылатын түзетулер қазақстандықтардың өмір сүру сапасының әлсіреуіне әкеліп соғады, дейді Мәжіліс депутаты А.Перуашев.
Салық кодексіне ұсынылатын түзетулер қазақстандықтардың өмір сүру сапасының әлсіреуіне әкеліп соғады, дейді Мәжіліс депутаты А.Перуашев.
Мұны депутат Мәжілістің салық салу мәселелері туралы заң жобасын таныстыру бойынша өткен отырысында айтты. Ескерте кетейік, Үкіметтің жеке тұлғалар пәтерлерінің аумағы 150 шаршы метрден, жер үйлерінің көлемі 300 шаршы метрден асатын меншіктерге 3 есеге дейін салықты көтеру, «қанша ластасаң, сонша төлейсің» деген қағидамен қуаты 3-4 мың текше см. көлемнен асатын көліктерге салық мөлшерлемелерін ұлғайту және т.б. қарастырып жатқаны белгілі.
«Неге сіз тұрғын үйде қанша адам тұратындығынан гөрі, тұрғылықты ауданын ғана есепке алып отырсыз? – деді таныстырылым барысында Азат Перуашев Экономика және бюджеттік жоспарлау министрі Ерболат Досаевқа. – 150 шаршы метр деген 4-6 баласы бар отбасыға не болады? Қазақ отбасыларында үш ұрпақ: балалары мен әке-шешесі ғана емес, сондай-ақ, ата-әжесі де бірге тұра береді. Астана мен Алматыда, облыс орталықтарында туған-туысқандарының балаларының не оқуға, не жұмыс істеуге келетіндері тағы бар. Неге осы жәйтті ескермейсіздер? Бүгіндері көпбалалық арқылы демографияны қолдау керектігін айтып жүрміз. Оларға көмектесудің орнына, керісінше, мұндай отбасыларға қалайша меншік салығын 3 есеге көбейтеміз?!»
А.Перуашев министрге тұрғын үй құрылысын дамыту мен өмір сүру стандарттарының деңгейін жақсарту туралы Елбасының тапсырмаларын есіне салып өтті. «Сіз са-палы өмір сүруге ынталандырудың орнына кедейшілікке итермелеп, тұрғындарымызды қайтадан «хрущевкаларға» тығуды ұсынып отырсыз? Тұрғын үй құрылысы, жақсы үйге сұраныс – бұл жұмыс орындары, бұл бюджетке салық түсіру, бұл құрылыс материалдарын өңдіру. Сонда сіз іс жүзінде осыларды қысқартуды ұсынып отырғаныңызды түсінесіз бе?», – деді депутат.
Көлікке салынатын салықты ұлғайту туралы Азат Перуашев: «Бұл – тікелей Ресей автомобильдерінің мүддесін қорғау, бірақ олардың атмосфераны ластауы нөлдің шамасындағы 3 литрлік «Мерседес» немесе «Тойоталарға» қарағанда көлемі шағын болғанымен, газ қалдықтарын шығаруы көп», – деді. Оның пікірінше, Үкімет экология үшін күрес дегенді желеу етіп, ресейлік өнімнен гөрі сапалы заманауи көліктерді сатып алушыларға шүйлігуде. «Біз онсыз да сырттан келетін көліктерге әкелім баж салығын өсірдік. Ал енді Ресейдің мүддесін одан әрі тықпалай бермей, өзіміздің азаматтарымыздың өз қаржыларына алғысы келетін таңдау құқықтарын неге қорғамаймыз», – деді депутат.
А.Перуашев қоғамда кең талқыланып жүрген көлік салығын оны жанар-жағармай материалдары акцизіне қосуға толық ауыстыратын тәжірибені зерттеуге шақырды: «Сол кезде біз шынымен де ауаны ластайтын шығыны көп экономикалық тиімсіз қозғалтқышы бар автокөлік иелерін көп төлетуге мәжбүрлейміз», деді депутат осы орайда.
Сәулебек БІРЖАН.
