«Нұр Отан» ХДП Ақтөбе облыстық филиалының кезектен тыс ХVI конференциясы өткізілді. Оған Парламент депутаттары, барлық бастауыш ұйымдардан сайланған 177 делегаттың 162-сі, партияның облыстық филиалы саяси кеңесінің мүшелері, қалалық және аудандық филиалдары төрағаларының бірінші орынбасарлары, үкіметтік емес ұйымдар өкілдері қатысты.
«Нұр Отан» ХДП Ақтөбе облыстық филиалының кезектен тыс ХVI конференциясы өткізілді. Оған Парламент депутаттары, барлық бастауыш ұйымдардан сайланған 177 делегаттың 162-сі, партияның облыстық филиалы саяси кеңесінің мүшелері, қалалық және аудандық филиалдары төрағаларының бірінші орынбасарлары, үкіметтік емес ұйымдар өкілдері қатысты.
Конференцияда «Нұр Отан» ХДП облыстық филиалы төрағасының бірінші орынбасары Асқар Ғабидуллин «Қазақстан-2050» Стратегиясын жүзеге асыру аясында «Нұр Отан» ХДП жаңа міндеттері және партияның «Нұр Отан». Нұрлы болашақ жолында!» саяси жобасы туралы» деген тақырыпта баяндама жасады. Ол Саяси доктринаның басым бағыттарын тарата әңгімелей келіп, партияның ұзақ мерзімді бағдарламасын жүзеге асыруға байланысты байламды ойларын ортаға салды.
– Қазақстан Республикасының Президенті Нұрсұлтан Назарбаев айқындаған «Қазақстан-2050» Стратегиясының жаңа саяси бағытына байланысты барлық жоспарларымыз бен міндеттерімізді елді 2050 жылға дейін дамытудың стратегиясы басты қағидаларымен сәйкестендіруіміз қажет. Бұл – басты даму жолымыз және болашақтағы жетістіктеріміздің кепілі. Дамудың ұзақ мерзімді бағыт-бағдары мен жалпыұлттық жетістіктердің стратегиялық көрінісін әзірлеуге деген объективті тарихи сұранысты «Нұр Отан» партиясы ғана сабақтастыруда. Ел азаматтарының өмірін сапалы жақсартуға ұмтылыс, оны қоғамның бірлескен күш-жігерімен және әлеуметтік келеңсіздіктерсіз қамтамасыз етуге дайын болу – партия Доктринасының арқауы мен өзегі болып табылады, – деді Асқар Ғабидуллин.
Конференцияда сөз алған Парламент Сенатының депутаты, «Нұр Отан» ХДП Саяси кеңесінің мүшесі Сергей Громов барлық басымдығымыздың өзегі мемлекетіміздің тәуелсіздігі, еліміздің егемендігі дегенді алға тарта отырып, партияның Саяси доктринасының осы құндылықтарымызды нығайтуға бағытталғанын атап өтті. Ал Парламент Мәжілісінің депутаты, «Нұр Отан» ХДП фракциясы жетекшісінің орынбасары Ерген Дошаев Саяси доктринаны дамудың жаңа көкжиектерін ашқан, партияның идеялық-дүниетанымдық және құндылықты бағдарларын анықтаған баянды құжат ретінде бағалады.
Басқа сөйлегендер де Саяси доктринадан туындайтын міндеттерді жүзеге асыру жайына жан-жақты тоқталды.
Конференцияда алда болатын «Нұр Отан» ХДП-ның кезектен тыс ХV съезіне делегат болып 58 ақтөбелік сайланды.
Сатыбалды СӘУІРБАЙ,
«Егемен Қазақстан».
Ақтөбе облысы.
