Аймақтар • 25 Мамыр, 2020

Алматының әкімі төртінші тоқсанда мектептерде қыруар еңбек атқарылғанын атады

11 рет көрсетілді

Бүгін Бақытжан Сағынтаев мектеп бітірген алматылық түлектерді өзінің әлеуметтік парақшаларында құттықтады.

Алматы әкімі 9 299 мектеп түлегінің үлкен өмірге қанат қаққанын атап өтті. Соның ішінде 545 түлек – «Алтын белгі» иегері, 714 оқушы оқу озаты атанды.

Биыл мектептерде соңғы қоңырау алғаш рет онлайн түрде соғылды.

Бақытжан Сағынтаев өзінің құттықтауында мектеп директорлары мен ұстаздардың осынау естен кетпес сәттің сән-салтанатын келістіріп, сезіндіру үшін қолдан келгенді жасағандықтарын ерекше айтты.

«Қыруар еңбек атқарылды. Төртінші тоқсанда сабақтар қашықтан өтті. Оқу процесінің үзілмеуі үшін жедел іске кірістік», – деп жазған шаһар басшысы ұстаздар мен мектеп директорларының қажырлы еңбектерін атап өтті.

Мектеп директорларына, ұстаздарға, оқушылар мен олардың ата- аналарына алғыс білдірген қала әкімі қиын сәтті бірлесе еңсере білгеннің арқасында құнды тәжірибе жинақаталғанын, оның болашақтағы заман сынағына лайықты төтеп беруге көмектесетінін баса көрсетті.

«Биылғы түлектер мектепті онлайн тәмамдаған пионерлер болды. Сендер қолайсыз жағдайда да білімге ерекше құштарлық таныттыңдар. Балаларға қолдау көрсеткен ата-аналарға мың алғыс. Өз міндеттерін мүлтіксіз атқарған мұғалімдерге рақмет!», – дейді қала әкімі.

Бақытжан Сағынтаев өзінің құттықтауында түлектерді табанды, тапқыр және қайсар болуға шақырды.

«Өмірлеріңіздің жаңа парағын ашқалы тұрсыздар. Білім көкжиегін кеңейтуге мүмкіндік көп. Қай мамандықты таңдасаңыз да, сол мамандықтың білгір маманы болып шығуға тырысыңыздар. Табандылық – арман мен мақсатыңа апарар алғашқы қадамың. Оқушының жетістігі – ұстаздың абыройы, еңбегінің нәтижесі. Ақ жол!», – деп қорытындылады сөзін Бақытжан Сағынтаев.

Соңғы жаңалықтар

Шәміл

Тарих • Кеше

ZOOM акциялары қымбаттады

Технология • Кеше

Ұқсас жаңалықтар