Заң жобасы өнеркәсіптік қауіпсіздік саласындағы заңнама нормаларын жетілдіруге, бизнеске әкімшілік қысымды азайтуға, қауіпті объектілерде мемлекеттік қадағалауды жүзеге асырудың тиімділігін арттыруға, өнеркәсіптік қауіпсіздік саласында жұмыс жүргізу құқығына аттестатталған және авариялық-құтқару жұмыстарын жүргізу бойынша көрсетілетін қызметтерді ұсынатын ұйымдардың қызметін реттеуге, сондай-ақ қолданыстағы заңнамадағы заңнамалық олқылықтар мен коллизияларды жоюға бағытталған.
Аталған құжатты депутаттардың назарына Индустрия және инфрақұрылымдық даму министрі Бейбіт Атамқұлов ұсынды.
– Заң жобасы бойынша алдымен кәсіпорындарда өндірістік бақылау қызметтерін қызметін регламенттеу және бұған жауапты лауазымды тұлғалардың мәртебесін күшейту ұсынылады. Атап айтқанда, ұйымның лауазымды тұлғаларына қызметкерлердің өмірі мен денсаулығына қауіп төндіретін, талаптарды бұза отырып жүзеге асырылатын жұмыстарды тоқтата тұру өкілеттігімен өнеркәсіптік қауіпсіздіктің жай-күйін тексеруді ұйымдастыру мен жүргізу және өнеркәсіптік қауіпсіздік талаптарына сәйкес келмейтін адамдарды жұмыстан шеттету құқығын беру ұсынылады. Екіншіден, өнеркәсіптік қауіпсіздік саласындағы жұмыстарды жүргізу құқығы аттестатталған ұйымдардың және авариялық-құтқару жұмыстарын жүргізу жөніндегі қызметтерді ұсынатын ұйымдардың қызметін реттеу көзделеді. Бұл норма 2018 жылы кәсіби авариялық-құтқару қызметтерін аттестаттау рәсімін алынып тасталуына және «Азаматтық қорғау туралы» Заңында өнеркәсіптік қауіпсіздік саласындағы аттестатталған ұйымдардың қызметін реттейтін сұрақтардың болмауына байланысты ұсынылады, – деді министр.
Бұған қоса заң жобасында қауіпті өндірістік объектілерде тау-кен құтқару, газдан құтқару, бұрқаққа қарсы жұмыстарды жүргізу сияқты өнеркәсіптік қауіпсіздік саласындағы кәсіби авариялық-құтқару қызметінің негізгі белгілерін регламенттеу және оларға қойылатын талаптарды белгілеу ұсынылады.
