Елі бай, жері бай

Үржар өңірінің өнерпаздары өскемендіктерді ән мен күйге сусындатса, қожалық иелері мен диқандар жәрмеңке көрігін қыздырды

Үржар өңірінің өнерпаздары өскемендіктерді ән мен күйге сусындатса, қожалық иелері мен диқандар жәрмеңке көрігін қыздырды

Күн сенбі. Өскеменнің Метал­лургтер мәдениет сарайы алды­на қала тұрғындары сыймай кетті. Таңғы сағат 9.00-де «Туған елге – тағзым! акциясы бойынша Үржар ауданы өнерпаздары мен диқандарының Өскемендегі мәдени шарасы басталды. Алма­тыдан Қазақстанның халық жа­зушысы Қабдеш Жұмаділов, атақты балуан Дәулет Тұрлы­ха­­новтың алтын құрсақты анасы Мәрзия қажы Айтбайқызы, ака­демик, қайырымдылығымен аты шығып жүрген Ұлықпан Сыдық, үржарлық жазушы Сәбит Шөм­шеков пен белгілі меценат Сай­лау­бек Нұрсила, тағы басқалар аудан күнінің Өскеменде лайықты өтуі үшін алыстан атшалдырып келіп қалыпты. Аудан әкімі Серік Зайнулдин жәрмеңкенің тек базарға айналып кетпеуін қатты қадағалап, ауданда өндірілетін өнім мен мәдени жәдігерлер жайлы арнайы тігілген киіз үйде мұражай ашып қойыпты. Оны тамашалап жат­қандар аз емес. Бір киіз үйде тұр­­мысы нашар жандарға тегін та­ғам ұйымдастырылып, азық-түлік үлес­тіріліп жатқанын көріп, риза болдық.

Бұл жолы үржарлықтар онда­ған тонна жылқы, ірі қара, қой етін әкеліпті. Оның келісін 900-1000 тең­­геден пышақ үстінен талап әке­тіп жатыр. Алакөлдің сазаны мен көк­сер­кесінің келісі 400 теңге ғана екен.

Қазақстанның халық жазушы­сы Қабдеш Жұмаділов, өңір бас­шысы Бердібек Сапарбаев жинал­ғандар алдында сөз алып, жәрмеңкенің ашы­луымен құттық­т­а­ды. Өңір бас­шысы «Туған жерге – тағзым!» акция­сының жалға­са беретінін, бар­лық аудан, қалаларда өндірілген кө­көніс, ет, сүт өнімдерінің қоңыр күз­ге дейін сатыла беретінін айтты.

Кешкілік Өскемен қаласының тұрғындары орталық мәдениет үйінде үржарлық өнерпаздардың өнерін тамашалады.

Оңдасын ЕЛУБАЙ,

«Егемен Қазақстан».

Өскемен.