Ақмолаға асыл тұқымды мал жеткізіліп жатыр

Аймақтар • 01 Маусым, 2020

Ақмолаға асыл тұқымды мал жеткізіліп жатыр

127 рет көрсетілді

Облыстағы сүт өңдеу нысандары 67 процент қана шикізатпен қамтылып отыр. Қазір осы олқылықтың орнын толтыруға ұмтылыс жасалып отыр.

Байқал БАЙӘДІЛ

Облыстық ауыл шаруашылығы басқармасының мәлімдеуінше, алдағы үш жылда бұл олқылықтың орны толтырылады. Таяуда Зеренді ауданындағы «Милк проджект» серіктестігі 300 басқа арналған шаруашылық нысанының құрылысын аяқтап, Еуропадан гольштейн-фриз тұқымды мал алдырды. Гольштейн-фриз тұқымы жылына 9-10 мың литр сүт береді. Шаруалар бұл сиырлардың жергілікті ауа райына бейімділігін, өнімділігін жоғары бағалайды. Нидерландтық асыл тұқымды малға тиісінше жағдай жасалуда. Сүт фермасы стандартқа сай жабдықталған.

– Әкелінген мал екі-үш айдан соң бұзаулайды. Кейін сүт өндірісіне кірісеміз. Бұдан бөлек тағы екі жүз бас мал сатып аламыз. Жүз сиыр Голландиядан әкелінеді, – дейді серіктестік директоры Юрий Швец.

Шетелден әкелінген асыл тұқымды мал басына 225 мың теңге субсидия бөлінеді. Алдағы уақытта бұл қолдау көлемі 400 мыңға дейін артады деп күтілуде. Бұл нысан өңірдегі сүт кластерін дамытуға алғашқы қадам. Зерендіде бұдан бөлек тағы 4 ферма салынбақ.

– Бұл компания Садовое ауылдық округінде осындай тағы бір ферма салуды жоспарлап отыр. «Молочная река» компаниясы Бұлақ ауылдық округінде сүт фермасын салуға қызығушылық білдіруде. «Ақжайық» кәсіпорны мен «Берекет-2050» серіктестігі де сүт өндірісімен айналысуға бет бұрып отыр. Мемлекет бұл бағытта үлкен қолдау көрсетіп жатыр, – дейді Зеренді ауданының әкімі Бауыржан Ғайса.

Ақ молайса, сүт зауыттары да толыққанды жұмыс істер еді. Шаруаның қолындағы бірер сиырдың сүтін жинап алу мәселесі оң жолға қойылса, өңдеуші кәсіпорындар шикізаттан тарықпайтындығын тағы да ескерген жөн.