Үстіміздегі жылғы 2 қыркүйек күні V шақырылған Қазақстан Республикасы Парламентінің 3-сессиясында Елбасы Нұрсұлтан Назарбаевтың Парламенттің өткен сессиядағы жұмыстарына оң баға беріп, елдегі қазіргі жағдайға толық шолу жасап, депутаттар алдына бес бағыт бойынша еліміздің әлеуметтік, саяси-экономикалық дамуын заңдылық тұрғыдан қамтамасыз ететін Парламент депутаттарының міндеттерін айқындап бергені белгілі.
Елбасы өзінің сөзінде: «Парламент жоғары саяси жауапкершілік режімінде жұмыс істеп, халық өкілі ретіндегі өз міндетін абыроймен атқарып келеді. Алдағы уақытта да осы қарқыннан таймау қажет. Себебі, біз дамудың ең шешуші сатысы – «Қазақстан-2050» Стратегиясын жүзеге асыру кезеңіне аяқ бастық. Стратегияның алға қойған негізгі мақсаты – әлемдегі ең озық 30 мемлекеттің қатарына ену. Бұл барша Қазақстан халқына, оның ішінде сіздерге айрықша міндеттер жүктейді», деп атап өтті.
Үстіміздегі жылғы 2 қыркүйек күні V шақырылған Қазақстан Республикасы Парламентінің 3-сессиясында Елбасы Нұрсұлтан Назарбаевтың Парламенттің өткен сессиядағы жұмыстарына оң баға беріп, елдегі қазіргі жағдайға толық шолу жасап, депутаттар алдына бес бағыт бойынша еліміздің әлеуметтік, саяси-экономикалық дамуын заңдылық тұрғыдан қамтамасыз ететін Парламент депутаттарының міндеттерін айқындап бергені белгілі.
Елбасы өзінің сөзінде: «Парламент жоғары саяси жауапкершілік режімінде жұмыс істеп, халық өкілі ретіндегі өз міндетін абыроймен атқарып келеді. Алдағы уақытта да осы қарқыннан таймау қажет. Себебі, біз дамудың ең шешуші сатысы – «Қазақстан-2050» Стратегиясын жүзеге асыру кезеңіне аяқ бастық. Стратегияның алға қойған негізгі мақсаты – әлемдегі ең озық 30 мемлекеттің қатарына ену. Бұл барша Қазақстан халқына, оның ішінде сіздерге айрықша міндеттер жүктейді», деп атап өтті.
Шын мәнінде, біздің алдымызда ауқымды міндеттер тұр. Олар жаңа сессияда Елбасы айқындап берген заң шығару жұмыстарының бес бағыты: еліміздің экономикасының қарыштап дамуын құқықтық тұрғыдан қамтамасыз ету, әсіресе, инвестициялық бағытты, «жасыл экономиканы» барынша дамыту; азаматтарды әлеуметтік қамтамасыз ету, ең алдымен, зейнетақы жүйесін реформалау; құқық қорғау заңнамасын жаңғырту және терең реформалау, сондай-ақ қол қойылған маңызды мемлекетаралық келісімдер.
Сонымен қатар, Елбасы ЭКСПО-2017 көрмесін ұйымдастыру мен өткізу туралы заң жобаларын «шұғыл» деп жариялады. Бұл заң жобаларын Парламент 2014 жылдың І тоқсанында толық қабылдауы тиіс. Елбасы қойған міндеттерді іске асыруда Парламент депутаттарының жергілікті халықтың, шаруалардың, кәсіпкерлердің ұсыныс-пікірлерін, сын-ескертпелерін ескеруі өте маңызды.
Биылғы жазғы демалыстың соңында елге, яғни Оңтүстік Қазақстан облысына барып, халықтың жағдайымен, атқарылып жатқан жұмыстарымен таныстық. Көпшіліктің ұсыныс-пікірлерін тыңдадық. Елбасының басшылығымен еліміздегі жүргізіліп жатқан реформалар барысын түсіндіріп, Парламенттің бір жылдық жұмысы туралы есеп бердік. Биылғы жыл облыс тұрғындары үшін қолайлы болып тұр. Жұмсақ қыс, жаңбырлы көктем мен жаз тау бөктерлері мен сайын даланы құлпыртып, көкорай-шалғынға бөлесе, Қызылқұм мен Мойынқұм жайылымға бітіп қалды. Мал азығын жинау рекордтық көлемге жетіп, 3,8 миллион тонна жемшөп дайындалды.
Кездесуде тұрғындар Елбасымыздың салиқалы саясатының арқасында еліміздің экономикасы қарқынды дамып, халықтың әл-ауқатының жылдан-жылға өсіп келе жатқанын, елді мекендерде мектеп, аурухана, медпункттер салынып, жол, электр жүйелері жаңаланып, әр үй ауыз сумен қамтамасыз етіліп, елді мекендер көріктеніп, абаттана түскенін, бұл жұмыстар биыл да жалғасын тауып жатқанын айтты. Биылғы жыл – Елбасымыз Н.Ә.Назарбаевтың «Қазақстан-2050» Стратегиясында қойылған міндеттерді орындаудың алғашқы жылы. Елбасымыздың басшылығымен біз көздеген мақсаттарға міндетті түрде жетіп, Мәңгілік Ел боламыз, ол үшін ең бірінші елде ынтымақ пен бірлік, тұрақтылық пен татулық болуы керек. Әрбір азамат өз орнында аянбай еңбек етіп, еліміздің алға дамуына өз үлестерін қосуы тиіс.
Облыста ауыл шаруашылығын әртараптандыруға, еңбек өнімділігін арттыруға ерекше көңіл бөлінуде. Озық агротехникалық тәсілдерді енгізудің арқасында егін шаруашылығының өнімділігі артты. Жыл басында қосымша 95 гектар жерге жылыжай орналастырылып, оның көлемі 665 гектарға жетті. Бұл республикадағы жылыжайлардың 87%-ын құрайды. Өткен мерзімде жылыжайлардың есебінен 45 000 тонна көкөніс өнімі өндіріліп, Астана қаласы мен Солтүстік облыстарға жіберілді.
Тамшылатып суару әдісі 3,9 мың гектар жерге ендіріліп, жалпы көлемі 24,7 мың гектарға жетті. Бұл – республикадағы тамшылатып суару әдісімен игерілген жер көлемінің 72%-ы.
Мал шаруашылығы да даму үстінде. Мал тұқымын асылдандырудың бірден-бір жолы қолдан ұрықтандыру болғандықтан, үстіміздегі жылы барлық елді мекендерде малды қолдан ұрықтандыратын бекеттер салу жоспарланып, тиісті қаржы бөлінді. «Сыбаға» бағдарламасы да орындалуда. Облыста республикада алғаш рет «бір терезе» қағидасы бойынша «Кәсіпкерлерге қызмет көрсету орталығы» ашылып, мыңдаған кәсіпкерге жәрдем көрсетуде.
Осыдан 2-3 жыл бұрын Оңтүстікке келген сапарында Елбасымыз Н.Ә.Назарбаев «Шымкентті еліміздегі үшінші қалаға айналдыру керек. Шымкент миллион тұрғыны бар сәулетті қала болуы тиіс», деген болатын. Елбасының осы тапсырмасын орындау мақсатында қаланың бас жоспары жасалып, Үкіметте бекітілді. Жаңа бас жоспар бойынша қала аумағы үш есеге ұлғаяды. Жан-жақты қызу талқылаудан кейін жаңа іскерлік әкімшілік орталық салынатын жер – «Нұрсәт» шағын ауданы болып таңдалған.
Елді мекендерді аралағанда түйгеніміз, облыс әкімдігінің елдегі тұрақтылық пен ынтымақ-бірлікті қамтамасыз етудегі, реформаларды жүзеге асырудағы тиянақты жұмыстарының арқасында халықтың әл-ауқаты артып, өңірдің әлеуметтік-экономикалық дамуы тұрақты түрде алға басқаны байқалды. Соның айғағындай, Елбасы биылғы ақпандағы №550 Жарлығымен өңірлердің дамуын бағалау нәтижелері бойынша облыс республикада 3 жыл қатарынан жоғары қарқынмен дамып отырған облыс болып танылды. Ендігі мақсат алдағы кезде осы қарқынды сақтап, оны еселей түсу. Әрине, бұл оңай жұмыс емес.
Үстіміздегі жылы елімізді демократияландыруда өте маңызды қадам жасалды. Елбасының тапсырмасымен атқарылып жатқан әкімшілік реформаларға сәйкес республика бойынша 2457 аудандық маңызы бар қалаларда, ауылдық округтер мен оларға кірмейтін кенттерде әкімдер сайлауы өтті. Парламент қабылдаған заңға сәйкес ауыл әкімдеріне қосымша 67 өкілеттік беріліп, олардың қаржылық және экономикалық дербестігі кеңейтілді, кіріс көздерін қалыптастыру құқықтарын алды. Тұрғындардың жиналыстары жергілікті маңызы бар мәселелерді шешуге бөлінген бюджет қаражатын пайдалануға бақылау жүргізу мүмкіндігіне ие болды. Бұл жергілікті әкімдер жұмысына халық тарапынан бақылауды күшейтеді. Елбасының Жарлығымен аудан, қала әкімдері тоқсан сайын есеп беретін болды. Бұл шаралар жергілікті өзін өзі басқаруға, халықтың белсенділігін арттыруға, төменгі деңгейдің басқару жүйесінің сапасын (мөлдірлігін, ашықтығын) айтарлықтай арттыруға оң әсер етеді.
Әкімдер сайлауы мен олардың халық алдында есеп беруінің жаңа тәртібін көпшілік халық дұрыс қабылдады. 300 мың халқы бар Мақтаарал ауданындағы кездесуде осы ауданның құрметті азаматы, зейнеткер Елемес қажы Сапаров ақсақал былай деді: «Әкім болсаң, әділ бол, әкімнің сыншысы – халық. Әкім халыққа жақын, біте қайнасып жүруі керек. Әрқашан көпшілікті тыңдап, ақылдасып, пікірлесіп жүруі тиіс. Тыңдай білсең, естіген ой-пікірлерден талай інжу-маржан теріп алуға болады. Халық жай әңгіменің өзінде саған талай ақыл айтады, талап, міндет артады. Тек ала біл. Елбасының талаптары өте орынды». Расында да солай. Халық алдында есеп беріп, жиі ақылдасып, халыққа жақын жүрген әкімдердің ісі алға басып жатқанын өмірдің өзі көрсетіп отыр.
Облыста соңғы үш жылда 119 мектеп салынып, пайдалануға берілген. Екі «Назарбаев зияткерлік мектебі» жұмыс істеуде. Бүгінде 83 білім нысанының құрылысы жүргізілуде. Үстіміздегі жаңа оқу жылы қарсаңында 25 орта мектеп жас бүлдіршіндерге есігін айқара ашты. Жыл соңына дейін тағы 28 мектептің құрылысы аяқталады. Осыған қарамастан, оқушылар санының жылдан-жылға өсуіне байланысты 38 білім ұясы үш ауысымда оқытуда. Облыстағы 1018 мектептің 582-сі типтік, ал 436-сы ыңғайластырылған ғимараттарда орналасқан. Ыңғайластырылған білім ошақтарында арнайы пән кабинеттері жеткіліксіз, спорт залдары мен асхана жоқтың қасы. Облыста мектеп, балабақша салу күн тәртібіндегі бірінші кезектегі мәселе болып отыр. Сондықтан да, Үкімет тарапынан беріліп отырған көмек алдағы кезде де үлкен қарқынмен жалғасын табуы керек.
Тұрғындармен болған кездесулерде Үкімет қабылдаған «Ауыл шаруашылығын мемлекеттік қолдауды дамытудың 2013-2020 жылдарға арналған бағдарламасының» бағыттарына көбірек тоқталып, түсіндіруге тура келді. Бағдарламаның қабылданғанына 10 айдан артық уақыт өтсе де, оның негізгі бағыттарын, мемлекеттің шаруаларға жасап отырған жеңілдіктерін көптеген жерлерде шаруалар түгілі, ауыл әкімдері толық білмейтіні байқалды. Шардара ауданы – бұрыннан қой шаруашылығы мен егін шаруашылығы қатар дамыған аудан. Осы ауданда болған кездесуде қой шаруашылығын дамытуға байланысты сұрақтар қойылды. Қой шаруашылығын дамытуды ынталандыру мақсатында Үкімет жылына асыл тұқымды ұсақ сатып алуға 8000 теңге, әр саулықтың жем-шөбіне – 1500 теңге, 1 кг өндірілген қой етіне – 100 теңге, биязы жүнге 170 теңге субсидия береді. Ал алыстағы мал жайылымын суландыруға келесі жылдан бастап құдық қаздыруға кеткен шығынның 80%-ын субсидия есебінен қайтаратыны сөз болды. Осындай жеңілдіктердің ауыл шаруашылығы өнімдерінің барлық түрлеріне, оның ішінде төрт түлік мал басы мен оның өнімдеріне де берілетіндігі, техника лизингі мен несиенің пайызы мемлекет есебінен арзандатылғаны, мемлекетке қарызы бар шаруаларды қаржылай сауықтыру шаралары туралы тереңнен түсінік беруге тура келді.
Кездесуде шығып сөйлеген шаруа қожалығының төрағасы Тұрғанбек Қанаев: «Шіркін, тәуелсіз ел болған қандай жақсы. Өз саясатың бар. Кемеңгер басшың бар. Кәсіпкерлерге, шаруаларға деген қамқорлықты айтсаңшы. Бұрын өндірген өнімнің бәрін Үкімет арзан бағамен сыпырып алушы еді. Енді жерді тиімді пайдалан, егін ек, мал өсір, мал өнімін жинап қалаған жеріңе, қалыптасқан нарық бағасына сат. Сенің еткен еңбегіңе мемлекет қолдау көрсетіп, субсидия береді. Егін ексең де, мал өсірсең де, өніміне, басына қосымша қаржы төлейді. Шаруаға бұдан артық не керек? Бізге осындай жағдай жасап отырған Елбасына мың да бір рахмет. Алланың нұры жаусын! Көп нәрсе орындаушыларға байланысты екен ғой. Елбасының халыққа деген қамқорлығын орындаушылар неге өз дәрежесінде орындамайды, түсіндірмейді? Біз осы жеңілдіктер туралы бұқаралық ақпарат құралдарынан ғана естиміз, мемлекеттің қамқорлығын, жеңілдіктерді білмеген шаруа мемлекеттің қолдауынан шет қалып қояды. Бұл саланың дамуына кері әсерін тигізеді. Сайып келгенде, ұтылатын қоғам, халық», деп басшылар атына сын айтты.
Иә, бұл шындық. Ауыл шаруашылығы еңбеккерлеріне мемлекет тарапынан берілетін жеңілдіктерді толыққанды етіп жеткізуді Ауыл шаруашылығы министрлігінің жергілікті органдары, облыс, аудан әкімдіктері мықтап қолға алулары тиіс.
Оңтүстікте биыл көкөніс, бау-бақша өнімдерінің бағасы шарықтап тұр. Тамыз айының өзінде қиярдың бағасы – 90 теңге, қызанақ – 110-120, картоп – 110-120 теңге, ал қауын-қарбыздың килосы 60-70 теңгеге дейін көтерілді. Ал Астана, Алматы қалалары мен Солтүстік облыстарда баға бұдан да жоғары. Базарларға көптеген көкөніс, жеміс-жидек түрлері сырттан әкелінуде. Соңғы жылдары қауын-қарбызға құрт түсіп, жеуге жарамай жатыр. Ал оңтүстік – ежелден өсірген қауын-қарбыздарымен, көкөніс, жеміс өнімдерімен аты шыққан өңір. Өткен ғасырдың 60-70-80-жылдары жазғы демалысқа шыққан мектеп оқушылары мен студенттер вагонға қауын-қарбыз, көкөніс тиеп қаржы табатын. Ол қауын-қарбыздың дәмін айтсаңшы, шіркін! Диқандардың өсірген қауын-қарбыздарының бағасы жоғарыдан бекітілетіндіктен, тіпті арзан болатын, тиынмен есептеліп төленетін. Ал қазір жағдай мүлдем басқаша. Не өсіремін десең, өз еркің. Қайда сатсаң, қандай бағамен сатсаң, өзің білесің. Тіпті, шетелге шығарып сатсаң да мейлің. Оңтүстікте өсірген қауын-қарбызын шетелге шығарып сатып, қыруар қаржы тауып жатқан диқандар аз емес.
Әртүрлі себептермен істен шығып қалған суармалы жерлерді айналымға енгізу үшін мелиорациялық шаралар атқарылуы тиіс. Облыста бұл бағытта үлкен жұмыстар жүргізілуде. Тұзданған, істен шыққан жерлерді қалпына келтіру үшін жергілікті бюджеттен ондаған миллион теңге қаржы бөлініп жобалау-сметалық құжаттар жасалған. Оны игеруге облыстың күші жетпейді. Үкімет осы мәселені арнайы қарап, республикалық бюджеттен қаржы бөліп, суармалы жерлерді айналымға енгізуге, өндірілген өнімдерді республика өңірлеріне уақтылы жеткізуге мемлекеттік қолдау көрсетілсе, Оңтүстік Қазақстан облысының диқандары республика халқының сұранысын көкөніс, бақша өнімдерімен толық қамтамасыз еткен болар еді.
Облыста ауыл шаруашылығы өнімдерін терең өңдеу мәселесі толық шешімін таппай отыр. Жыл басынан бері 3 ет, 2 сүт, 1 көкөніс өнімдерін қайта өңдейтін жаңа кәсіпорындар іске қосылса да, облыс бойынша өндірілген еттің 13%-ы, сүттің 17%-ы, көкөністің, жемістің небәрі 8%-ы ғана қайта өңделуде. Бұл – өте аз. Облыста құрылған сервистік дайындау орталықтары өз дәрежесінде жұмыс істемеуде. Олардың жұмыстары өңдеу кәсіпорындарын шикізатпен қамтамасыз етуге бағытталмаған. Өңдеушілер мен ауыл шаруашылығы тауарын өндірушілер арасында тығыз байланыс жоқ. Сонда сервис-дайындау пункттері не үшін құрылды? Оларға мемлекет тарапынан берілген қыруар қаржының қайтарымы қайда деген заңды сұрақ туындайды.
Жергілікті атқарушы органдар мен әлеуметтік-кәсіпкерлік корпорациясы өңірдің индустрияландыру картасы аясында ашылған өндіріс орындарын пайдаланып, ауыл шаруашылығы өнімдерін өндіру мен оны өңдеудің толық циклын қамтамасыз ету үшін шаруа қожалықтары мен өңдеу кәсіпорындарын кооперациялау жұмыстарын тиянақты жүргізу керек.
Елбасының батыл шешімімен қысқа мерзімде салынып, пайдалануға берілген Көксарай су реттегіші, Сыр бойы қоныстанған 69 елді мекен мен Қызылорда қаласының халқын жыл сайынғы су тасқыны қаупінен құтқарды. Көксарайда қыс, көктем мерзімдерінде дарияның 3 млрд. текше метр суы сақталып, жаз айларында Қызылорда облысы халқының қажеттілігіне жұмсалып, артылғаны Кіші Аралдың су қорының көбеюіне оң әсерін тигізуде. Өңірдегі экологиялық жағдай да жақсарды. Арыс, Шымкент базарларында арзан балық өнімдері де көбейе түсті.
Оңтүстікте шешімін таппай келе жатқан мәселенің бірі – «Шардара су қоймасының Арнасай бөгетінде гидротехникалық құрылыстар кешенін қайта жаңғырту» жобасы. Республика үшін өте маңызды бұл жобаның құрылысы әртүрлі себептермен созылуы еліміздің сумен қамтамасыз ету қауіпсіздігіне кері әсерін тигізуде. Себебі, Шардара су қоймасы акваториясының бір бөлігі Өзбекстан аумағында қалып қойып, су қоймасында жинақталған су Өзбекстан тарапының кәдесіне асып жатыр. Екіншіден, Шардара су қоймасын қауіпсіз пайдалану үшін салынған Арнасай бөгеті екі ел шекарасында қалып, оған баратын жол Өзбекстан жағында қалғандықтан, Арнасай бөгетінде Қазақстан жағынан қатынас тек су арқылы болып қалды. Үшіншіден, жарты миллионға жуық халық тұратын Мақтаарал және Шардара аудандары арасындағы асфальт жол да көрші республика аумағында қалып, көлік қатынасы тоқтап, халықты абыржытуда. Аталған жоба бойынша, ұзындығы 33 шақырым келетін оң және сол жағалау дамбаларын көтеру және оның үстінен жол салу жұмыстарына 4,4 млрд. теңге қаржы бөлініп, оның І-ІІ-ІІІ кезеңдері атқарылып жатқан болатын. Бас мердігер – «Қазсушар» республикалық мемлекеттік кәсіпорны бұл маңызды гидротехникалық құрылысты тәжірибесі жоқ оншақты ұсақ мердігерлерді жалдап, атқаруын тексеру барысында сапасыз істелген жұмыстар анықталып, құрылысты уақытша тоқтатуға тура келді. Құрылыс жұмыстарының созылуы Шардара су қоймасына тиісті көлемде су жинауға кері әсерін тигізуде. Өткен жылы су қоймасына 1 млрд. текше метр су аз жиналды. Құрылыс жұмыстарын тездетіп бітірмесе, мұндай жағдай биыл да, келер жылы да қайталанып, Оңтүстік Қазақстан және Қызылорда облыстары диқандарын ағын сумен қамтамасыз етуге зиянын тигізуі мүмкін. Сонымен бірге, екі ауданды байланыстыратын дамба үстінен салынатын асфальт жолдың құрылысы да созылып, халықтың ренішін тудыруда. Су алтынмен тең заманда миллиардтаған текше метр судан айырылып отырғанымыз жарамайтын, жараспайтын «жомарттық».
Бұл маңызды құрылысты тез бітіру үшін Үкімет 2014 жылы республикалық бюджеттен тиісті көлемде қаржы бөлуі керек. Ал Қоршаған ортаны қорғау министрлігі аталған құрылысты жүргізуді конкурс арқылы гидротехникалық құрылыс салуда тәжірибесі мол мердігерге беріп, оны тез арада іске қосуға тиіс.
Қорыта айтқанда, елдегі болған кездесулерден түйгеніміз – халық Елбасы Н.Ә.Назарбаевтың жүргізіп келе жатқан саясатын толығымен және бірауыздан қолдайды. Әсіресе, әлемде әртүрлі кикілжіңдер орын алып, дамыған елдердің өзі дағдарыстан шыға алмай жатқанда, біздің елдің серпінді дамуы тұрақтылық пен бірліктің, Елбасының сара саясатының арқасында екенін айтады.
Біздің ендігі мақсатымыз – Мемлекет басшысының Парламент алдына қойған міндеттерін, уақыт талабына сай орындау. Сонымен бірге, елдегі кездесулерде айтылған құнды ұсыныстарды тиісті орындар алдына қойып, олардың шешілуіне ықпал ету.
Қуаныш АЙТАХАНОВ,
Парламент Сенатының депутаты.