Әлемдік және дәстүрлі діндер көшбасшылары съезі Хатшылығының отырысы қорытындыланды
Әлемдік және дәстүрлі діндер көшбасшылары съезі Хатшылығының басшысы Қайрат Мәми Астанада өткен жұмыс бабындағы кеңесте Съезд Хатшылығы XII отырысының және «Өркениеттер үнқатысуындағы дінаралық Астана форумының рөлі» халықаралық ғылыми-тәжірибелік конференциясының жұмысын қорытындылады, деп хабарлады Сенаттың баспасөз қызметі.
Кеңеске Сыртқы істер министрлігінің, Дін істері жөніндегі агенттіктің, Халықаралық мәдениет және діни орталықтың өкілдері қатысты. Онда Съезд Хатшылығы отырысына және конференцияға қатысушылардың баяндамаларына шолу жасалды. Атап айтқанда, меймандардың бәрі толеранттылық жөніндегі жаһандық үнқатысуды дамытудағы Қазақстан Президенті Нұрсұлтан Назарбаевтың жеке үлесін атап өтті. 10 жылда Съезд әлемдік дін көшбасшыларының іс жүзіндегі үнқатысу алаңы ретінде қалыптасты.
Қ.Мәми Хатшылық отырысы және конференция барысында айтылған ұсыныстар мен идеяларға мұқият талдау жасап, сондай-ақ, соның негізінде келешек шаралар жоспарын әзірлеуге тапсырма берді. Хатшылық мүшелері V Съездің жалпы тақырыбын «Дін және тұрақты даму» атауымен бекіткен болатын. Таяу уақытта секциялық отырыстар, сонымен бірге, келесі Съездің мерзімі мен өтетін орны бойынша ұсыныстар пысықталады.
Кеңесте Съездің арнаулы қорын құру, сондай-ақ съездер аралығында Хатшылық мүшелерінің қызметін үдету, діни қайраткерлер арасында жүйелі ақпарат алмасуды қалыптастыру, бірлескен білім беру бағдарламалары мен оқу құралдарын әзірлеу, сондай-ақ, азаматтық қоғаммен өзара іс-қимылды өрістету туралы ұсыныстарды зерделеуге тапсырма берілді.