Соныға соқпақ салу қайдан оңай болсын, бір кезде Нұр-Сұлтан қаласындағы шағын ғимаратты жалдап алған олар дайын өнімді сатумен де айналысып көрді. Әрине бұл кәсіптің жеңіл түрі. Өтімдісін таңдап алып, бір жерден әкеліп, екінші жерге сатасың. Бар жұмыс осымен ғана шектеледі. Табыс болғанымен, тағылымы қанағаттандыра қоймады. Өз өнімдерін шығарған әлдеқайда артық емес пе? Қазақ баласы бұрын да жалаң аяқ жүрген жоқ қой. Ел ішіндегі қолы епті шеберлер аяқкиімнің неше атасын тіккен. Тек атадан мұра болып келе жатқан сол өнер кеңес заманында ұмытылды. Бұрынғы барды қайта жаңғыртса несі айып? Осындай ойға келген соң, серіктестік басшысы 2010 жылы жеке цех ашуға шешім қабылдады.
Сөйтіп «SAMHAT» серіктестігі Ақмол ауылына көшіп, жергілікті бизнестің өрісін кеңейтуге бел байлады. Өзгеше тың идеямен кәсібін өрге жүздірмек болған кәсіпкерді облыс және аудан басшылығы қолдай кетті. 2013 жылы 1,2 гектар жер телімі мен 1200 шаршы метр гараж ғимараты бөлінді. Жөндеу және жабдықтау жұмыстарынан кейін кәсіпорын толық қуатпен жұмыс істей бастады. Мәселен, 2015 жылдың он бір айында ғана 800 млн теңгенің 100 мың жұп аяқ киімі талғампаз тұтынушыға ұсынылды. Сол-ақ екен, аты дүркіреп шыға бастады. Кәсіпорын негізінен қорғаныс саласының мемлекеттік тапсырысын орындады. Біртіндеп жұмыс ауқымын кеңейтуге мүмкіндік туып отыр.
Аяқкиімнің сапасы ең алдымен шикізатқа байланысты. Бұл арада бүгінгі тұтынушының талғамын әбден ескерген дұрыс. Қазір бұл саладағы озық үлгіге көз қанықтырып, сапасын салыстырып бағалай білетін адамдардың талғамынан шығу да оңай-оспақ шаруа емес. Ол үшін қапысыз шеберлік қажет-ақ. Шеберлер өндірісте табиғи теріні пайдаланады. Бұл экологиялық жағынан таза өнім. Дәл осы арада елімізде шикізаттың бұл түрінің кәдеге аспай жатқанын, екпін түсіріп айта кеткен ләзім. Жеңіл өнеркәсіптің жолы болмай жатқандықтан, еліміздегі мал шаруашылығының аса бағалы өнімі – тері текке шіріп жатыр. «SAMHAT»-тың тәжірибесімен-ақ жер-жерде осындай жұмыс ұйымдастырылса, өзімізді өзіміз әдемі де сапалы аяқкиіммен қамтамасыз етер едік. Шеттен келген бұйымның барлығы бірдей сапалы деп айтуға ауыз бармайды. Кейбіреуі әртүрлі тері ауруларына себеп болып жатқаны да жасырын емес. Осы тұрғыдан келгенде «SAMHAT» аяқкиім фабрикасының қадамы құптарлық-ақ.
Қазір фабрика өнімін жалпақ жұрт жақсы танып қалған. «SAMHAT» шығарған аяқкиімдердің сапалы екені ешқандай жарнамасыз-ақ көрініп тұр. Фабрика басшылығы да ең алдымен жоғары сапалы өнім өндіруге, жаңа технологияларды өндіріске батыл енгізуге әрі кезең-кезеңімен жаңғыртып отыруға көп көңіл бөледі. Ол үшін, әрине, жаңа жоғары технологияны қолданарлық толайым құрылғылар қажет.
Бұл арадағы басты мақсат – алдымен адам денсаулығына көңіл бөлу. Қолданылған шикізаттың сапасы гигиеналық талапқа толық жауап бергені жөн. Оның үстіне аяққа жайлы болуы қажет, көңіл бөлу ұзақ киіске шыдағаны дұрыс. Осыны ескере отырып, шикізаттың барлық түрі қатаң бақылауға алынып, сертификаты барлары ғана кәдеге жаратылады.
– Аяқкиім тігу – күрделі жұмыс, – дейді серіктестіктің бас директоры Самал Тілеубаева, – тұтынушылардың кәдесіне жарату бар да, бәсекелестікке төтеп беру бар ғой. Сондықтан біз өз өнімдеріміздің мінсіз болуын қалаймыз.
Фабрика толық қуатында жұмыс істеген кезінде 150 адамды жұмыспен қамту мүмкіндігіне ие болады. Әзірге кейбір мамандардың жоқтығы қолбайлау болып отыр. Мәселен, технолог, механик, тігінші тәрізді бірнеше мамандық бойынша маман қажет. Жұмыс істеп жүрген адамдардың кәсіби шеберліктерін жетілдіру өз алдына бір мәселе. Фабрика бүгінгі таңда ерлер және әйелдер аяқкиімін, әскери-күштік құрылымдарға, жұмысшыларға арналған аяқ- киім шығарады.
Ынта болса, оңынан оралмайтын шаруа жоқ. Отандық өнімнің асығын алшысынан түсіретін осындай қадау-қадау қажырлы қарекет қой, шіркін!
Ақмола облысы
